சென்னை: கர்நாடக மாநிலம் பெங்களூருவில் நேற்று இரவு மோசமான வானிலை நிலவியதால் பெங்களூரு விமான நிலையத்தில் தரையிறங்க வேண்டிய 14 விமானங்கள் பெங்களூருவில் தரையிறங்க முடியாமல் சென்னை விமான நிலையத்தில் வந்து தரை இறங்கின. இதனால் சென்னை விமான நிலையத்தில் நள்ளிரவில் பெரும் பரபரப்பு ஏற்பட்டது. விரைந்து நடவடிக்கைகள் மேற்கொள்ளப்பட்டு கூடுதல் ஊழியர்களை பணியில் அமர்த்தி சமாளித்தனர்.
நேற்று இரவு 10:25 மணிக்கு கொல்கத்தாவில் இருந்து பெங்களூரு சென்ற இண்டிகோ ஏர்லைன்ஸ் விமானம், இரவு 10:35 மணிக்கு டெல்லியில் இருந்து பெங்களூரு வந்த ஏர் இந்தியா விமானம், இரவு 10:40 மணிக்கு டெல்லியில் இருந்து பெங்களூரு வந்த விஸ்தாரா ஏர்லைன்ஸ் விமானம், இரவு 10:55 மணிக்கு சென்னையில் இருந்து பெங்களூரு சென்ற ஏர் ஏசியா விமானம், இரவு 11:05 மணிக்கு டெல்லியில் இருந்து பெங்களூரு சென்ற, இண்டிகோ ஏர்லைன்ஸ் விமானம்,
இரவு 11:05 மணிக்கு சென்னையில் இருந்து பெங்களூரு சென்ற இண்டிகோ ஏர்லைன்ஸ் விமானம், இரவு 11:10 மணிக்கு புபனேஸ்வரிலிருந்து பெங்களூரு சென்ற இண்டிகோ ஏர்லைன்ஸ் விமானம், இரவு 11:15 மணிக்கு மும்பையில் இருந்து பெங்களூரு சென்ற இண்டிகோ ஏர்லைன்ஸ் விமானம், இரவு 11:25 மணிக்கு மும்பையில் இருந்து பெங்களூரு சென்ற ஏர் ஏசியா பயணிகள் விமானம், இரவு 11:35 மணிக்கு சூரத்திலிருந்து பெங்களூரு சென்ற ஏர் ஏசியா பயணிகள் விமானம்,
இரவு 11:40 மணிக்கு மலேசியத் தலைநகர் கோலாலம்பூரில் இருந்து பெங்களூரு சென்ற மலேசியன் ஏர்லைன்ஸ் விமானம், நள்ளிரவு 12:10 மணிக்கு டெல்லியில் இருந்து பெங்களூரு சென்ற ஸ்பைஸ் ஜெட் ஏர்லைன்ஸ் விமானம், நள்ளிரவு 12:20 மணிக்கு டெல்லியில் இருந்து பெங்களூரு சென்ற இண்டிகோ ஏர்லைன்ஸ் விமானம், நள்ளிரவு 12:40 மணிக்கு ஹாங்காங்கில் இருந்து பெங்களூரு சென்ற கேத்தே பசிபிக் ஏர்லைன்ஸ் விமானம், ஆகிய 14 விமானங்கள் அடுத்தடுத்து சென்னை விமான நிலையத்தில் வந்து தரை இறங்கின.
இந்த விமானங்களில் வந்த பயணிகள் அனைவரையும் விமானங்களை விட்டு கீழே இறக்காமல் விமானங்களிலேயே அமர வைக்கப்பட்டு இருந்தனர். அந்தந்த ஏர்லைன்ஸ் நிறுவனத்தைச் சேர்ந்தவர்கள் உணவு, குடிநீர் வசதிகளை செய்து கொடுத்தனர். இதனால் சுமார் 2 மணி நேரத்திற்கு சென்னை விமான நிலையம் முழுவதும் பரபரப்பாக இருந்தது.
ஏற்கனவே சென்னை விமான நிலையத்தில் நள்ளிரவில் இருந்து அதிகாலை வரை வெளிநாட்டு விமானங்கள் பெருமளவு வந்து தரை இறங்கி கொண்டு இருக்கும். அந்த நேரத்தில் பெங்களூருவில் தரையிறங்க வேண்டிய 14 விமானங்கள் சென்னையில் வந்து தரை இறங்கியதால் சென்னை விமான நிலைய கட்டுப்பாட்டு அறை அதிகாரிகள் தரை தளப்பணியில் உள்ள லோடர்களை சமாளிக்க முடியாமல் பெரும் சிரமத்திற்கு உள்ளானார்கள்.
இதனையடுத்து அவசர அவசரமாக கூடுதலாக கட்டுப்பாட்டு அறைக்கு அதிகாரிகளும், தரை தள ஓடுபாதை பகுதிக்கு கூடுதல் லோடர் ஊழியர்களும் வரவழைக்கப்பட்டு அந்த சுழலைச் சமாளித்தனர். அதன் பின்பு இன்று காலை ஒரு மணிக்கு மேல் பெங்களூருவில் வானிலை சீரடைந்த பின்பு இந்த விமானங்கள் அனைத்தும் ஒன்றன்பின் ஒன்றாக பெங்களூரு புறப்பட்டுச் சென்றன.
இதையும் படிங்க: Chennai Airport: பயணிகள் வரத்து குறைவால் சென்னை - மைசூரு - சென்னை விமானங்கள் ரத்து!
