சாலையோரம் நின்று கொண்டிருந்த லாரியின் மீது மற்றொரு லாரி மோதிய விபத்தில் இருவர் உயிரிழப்பு!

செங்கல்பட்டு: மதுராந்தகம் அருகே சாலையோரம் நின்று கொண்டிருந்த லாரி மீது, பார்சல் லாரி மோதிய விபத்தில், இரண்டு பேர் சம்பவ இடத்திலேயே உயிரிழந்த சம்பவம் அப்பகுதியில் பரபரப்பை ஏற்படுத்தியுள்ளது.

செங்கல்பட்டு மாவட்டம் மதுராந்தகம் அருகே சென்னை - திருச்சி தேசிய நெடுஞ்சாலையில் பாண்டிச்சேரி நோக்கிச் சென்று கொண்டிருந்த பார்சல் லாரி, சாலையோரம் பழுதாகி நின்ற மற்றொரு லாரியின் மீது எதிர்பாராத விதமாக மோதி விபத்துக்குள்ளானது.

இந்த விபத்தில் பார்சல் லாரியில் வந்த மூவரில், மாசிலாமணி(29), அருண்குமார்(30) ஆகியோர் சம்பவ இடத்திலேயே உயிரிழந்தனர். மேலும் விபத்தில் படுகாயமடைந்த ஆனந்தன்(31) என்பவரை அருகிலிருந்தவர்கள் மீட்டு மருத்துவமனைக்கு அனுப்பி வைத்தனர்.

இதையடுத்து தகவலறிந்து சம்பவ இடத்திற்கு வந்த அச்சிறுபாக்கம் காவல்துறையினர், உயிரிழந்தவர்களின் உடலை மீட்டு உடற்கூறு ஆய்வுக்காக மேல்மருவத்தூர் அரசு மருத்துவமனைக்கு அனுப்பி வைத்தனர்.

மேலும் இதுகுறித்து வழக்குப்பதிவு செய்து விசாரணை மேற்கொண்டு வருகின்றனர்.