விரைவு ரயில்கள் ரத்து - தென்னக ரயில்வே அறிவிப்பு!

சென்னை: தண்டவாளப் பராமரிப்பு பணிகள் நடைபெற்று வருவதால் ஒரு சில வழித்தடங்களில் விரைவு ரயில்கள் ரத்து செய்யப்படுவதாகத் தென்னக ரயில்வே அறிவித்துள்ளது.

குண்டக்கல் பகுதிக்குட்பட்ட குண்டக்கல் - குளுப்பாளையம் இடையே ரயில் சமிக்ஞைக் கருவி பராமரிப்பு பணிகளும், தண்டவாளப் பராமரிப்பு பணிகளும் நடைபெற்று வருவதால் இவ்வழியாகச் செல்லும் விரைவு ரயில்கள் ரத்து செய்யப்படுவதாகத் தென்னக ரயில்வே தெரிவித்துள்ளது. இது தொடர்பாகத் தென்னக ரயில்வே வெளியிட்டுள்ள செய்திக்குறிப்பில் உள்ள அறிவிப்புகள் கீழ்வருமாறு:

முழுவதுமாக ரத்து செய்யப்படும் ரயில்கள்:

• மே 4ஆம் தேதி அன்று இரவு 8.10 மணிக்கு இயக்கப்படும் எம்ஜிஆர் சென்னை சென்ட்ரல் - அகமதாபாத் சுவிதா சிறப்பு ரயில் (82611)
• மே 6ஆம் தேதி அன்று காலை 9.40 மணிக்கு இயக்கப்படும் அகமதாபாத் - எம்ஜிஆர் சென்னை சென்ட்ரல் (06052) சுவிதா விரைவு ரயில்
• மே 8ஆம் தேதி அன்று இயக்கப்படும் மும்பை சிஎஸ்டி - எம்ஜிஆர் சென்னை சென்ட்ரல் விரைவு ரயில் (01063)
• மே 9ஆம் தேதி இயக்கப்படும் சென்ட்ரல் - மும்பை சிஎஸ்டி சுவிதா சிறப்பு ரயில் (01064)

வேறு மார்க்கமாகச் செல்லும் ரயில்கள்:

• மே 3ஆம் தேதி காலை 8.25 மணிக்கு இயக்கப்படும் சாய் நகர் சீரடி - எம்ஜிஆர் சென்னை சென்ட்ரல் விரைவு ரயில், குண்டக்கல் - கூட்டி - கடப்பா - ரேணிகுண்டா வழியாகச் செல்லும்.
• மே 8ஆம் தேதி காலை 10.10 மணிக்கு இயக்கப்படும் எம்ஜிஆர் சென்னை சென்ட்ரல் - சாய் நகர் சீரடி விரைவு ரயில் ரேணிகுண்டா - கடப்பா - கூட்டி - குண்டக்கல் வழியாகச் செல்லும்.