ஆன்மிகத்திலும் தமிழுக்கும் தொண்டாற்றுபவர்களுக்குச் சிறப்பு விருதுகள் வழங்கப்படும் என்றும் திருக்குறளை உலக நூலாக "ஐக்கிய நாட்டுக் கல்வி அறிவியல் பண்பாட்டு அமைப்பு" (யுனெஸ்கோ) மூலம் அறிவிக்க நடவடிக்கை மேற்கொள்ளப்படும் என்று தமிழ் வளர்ச்சித் துறை அமைச்சர் கே.பாண்டியராஜன் சட்டப்பேரவையில் தெரிவித்தார். அதேபோல "பத்திரிகையாளர் நல வாரியம்" அமைக்க நடவடிக்கை எடுக்கப்படும் எனவும் சட்டப்பேரவையில் செய்தித் துறை அமைச்சர் கடம்பூர் ராஜூ அறிவித்தார்.
இதுகுறித்து, பால் முகவர்கள் சங்கத்தின் மாநில தலைவர் பொன்னுச்சாமி வெளியிட்டுள்ள அறிக்கையில், தமிழ்நாட்டுக்கு பல நல்ல அறிவிப்புகளை வெளியிட்டுள்ள அமைச்சர்கள் (கே.பாண்டியராஜன், கடம்பூர் ராஜூ) இருவருக்கும், தமிழ்நாடு பால் முகவர்கள் தொழிலாளர்கள் நலச் சங்கம் சார்பில் நன்றிகளையும், பாராட்டுகளையும் தெரிவித்துக் கொள்வதாகக் கூறப்பட்டுள்ளது.
மேலும் அன்னை தமிழுக்கு சிறப்பு சேர்க்கின்ற வகையில், தலைநகர் சென்னையில் சுமார் 1000அடி உயரத்தில் தமிழன்னைக்கு உலகிலேயே மிகப்பெரிய சிலையாக அமைக்கத் தமிழக அரசு நடவடிக்கை எடுக்க வேண்டும் என்று தமிழ்நாடு பால் முகவர்கள் தொழிலாளர்கள் நலச் சங்கம் சார்பில் வலியுறுத்திக் கேட்டுக் கொள்வதாக அதில் தெரிவிக்கப்பட்டுள்ளது.
