அசாம் மாநிலத்தை சேர்ந்த சாமன் உசேன் 36 என்பவர் சென்னௌ அண்ணா சாலை ஆயிரம் விளக்கு பகுதியில் உள்ள டாஸ்மாக் கடையில் சமையல் உதவியாளராக பணிபுரிந்து வருகிறார். இதே கடையில் புதுக்கோட்டை மாவட்டத்தை சேர்ந்த வள்ளியப்பன் (42) சமையல் மாஸ்டராக பணியாற்றி வந்துள்ளார். இவர்கள் இருவரும் பணி முடித்துவிட்டு டாஸ்மாக் கடையில் தூங்குவது வழக்கம். இந்நிலையில் கடந்து சில நாட்களாக இவ்விருவருக்கும் இடையே சமையல் செய்வதில் ருசி குறைபாடு காரணமாக மனஸ்தாபம் இருந்து வந்தது. மேலும் பலமுறை இவ்விருவரும் வாக்குவாதத்தில் ஈடுபட்டு வந்துள்ளனர். இதனைதொடர்ந்து நேற்று இருவருக்கும் இடையே வாக்குவாதம் முற்றி கைகலப்பானதாக கூறப்படுகிறது.
இந்நிலையில் இன்று காலை டாஸ்மாக் திறக்கும் போது உள்ளே வள்ளியப்பன் கழுத்து நெரிக்கப்பட்ட நிலையில் இறந்து கிடந்துள்ளார். இதனை தொடர்ந்து டாஸ்மாக் கடைக்காரர்கள் அளித்த தகவலின் பேரில் சம்பவ இடத்திற்கு சென்ற ஆயிரம் விளக்கு காவல்துறையினர் வள்ளியப்பனின் உடலை மீட்டு உடற்கூறு ஆய்விற்காக ராயப்பேட்டை மருத்துவமனைக்கு அனுப்பிவைத்தனர்.
மேலும் இது தொடர்பாக வழக்கு பதிவு செய்த காவல்துறையினர் தொடர்ந்து நடத்திய விசாரணையில் சாமன் உசேன் தலைமறைவாகியுள்ளதாகவும் அவரது அலைபேசி எண் அனைத்து வைக்கப்பட்டுள்ளதாகவும் தெரியவந்துள்ளது. இதனடிப்படையில் சாமன் உசேன் வள்ளியப்பனை கொன்று விட்டு தலைமறைவாகி இருக்கலாம் என்ற கோணத்தில் காவல்துறையினர் அவனை வலைவீசி தேடி வருகின்றனர்
