ரோஜர்ஸ் கோப்பை டென்னிஸ் போட்டிகள் இறுதிக் கட்டத்தை எட்டியுள்ளது. நேற்று நடைபெற்ற முதலாவது அரையிறுதிப் போட்டியில் உலகின் முன்னணி வீரரான ஸ்பெயின் நாட்டின் ரஃபேல் நடாலும் ஃபிரான்ஸ் நாட்டின் மான்ஃபில்ஸும் மோதவிருந்தனர்.
ஆனால் காயம் காரணமாக மான்ஃபில்ஸ் போட்டியிலிருந்து விலகியதால் ரஃபேல் நடால் அரையிறுதிப் போட்டியில் வெற்றிபெற்றதாக அறிவிக்கப்பட்டார். இதன்மூலம் நாளை நடைபெறவுள்ள இறுதிப் போட்டிக்கு அவர் நேரடியாக தேர்வு செய்யப்பட்டுள்ளார்.
மற்றொரு அரையிறுதிப் போட்டியில் ரஷ்யாவைச் சேர்ந்த டேனியல் மெட்வதேவ் சக நாட்டு வீரரான கரேன் கச்சனோவை எதிர்கொண்டார். இப்போட்டியில் மெட்வதேவ் 6-1, 7-6 என்ற நேர் செட் கணக்குகளில் கச்சனோவை வீழ்த்தி இறுதிப் போட்டிக்கு முன்னேறியுள்ளார்.
இதன் மூலம் நாளை நடக்கவுள்ள ரோஜர்ஸ் கோப்பை இறுதிப் போட்டியில் நடாலை, மெட்வதேவ் எதிர்கொள்கிறார்.
