புரோ கபடி லீக் தொடரின் 7ஆவது சீசன் ஹைதராபாத்தில் நடைபெற்று வருகிறது. இதன் 9ஆவது லீக் போட்டியில் தமிழ் தலைவாஸ் அணி, தபாங் டெல்லி அணியை எதிர்கொண்டது. முதல் பாதி ஆட்டத்தில் ரைட்டிங், டிஃபென்டிங் இரண்டிலும் தமிழ் தலைவாஸ் அணி ஆதிக்கம் செலுத்தியது. இதனால், முதல் பாதி முடிவில் தமிழ் தலைவாஸ் அணி 18-11 என்ற புள்ளிகள் கணக்கில் முன்னிலையில் இருந்தது.
இதைத்தொடர்ந்து, நடைபெற்ற இரண்டாவது பாதியில் தபாங் டெல்லி அணி எழுச்சியுடன் விளையாடியது. குறிப்பாக, கடைசி ஐந்து நிமிடத்தில் டெல்லி அணி 10 புள்ளிகளை பெற்று ஆட்டத்தின் பொக்கை தன் பக்கம் மாற்றியது. அதேசமயத்தில், தமிழ் தலைவாஸ் இரண்டு புள்ளிகளை மட்டுமே பெற்றுருந்தது.
இவ்விரு அணிகளும் தலா 29 புள்ளிகள் பெற்றுருந்ததால், ஆட்டத்தின் கடைசி டூ ஆர் டை ரெய்டிற்காக டெல்லி அணியின் நட்சத்திர ரைடர் நவின் குமார் உள்ளே வந்தார். அவரை தமிழ் தலைவாஸ் அணி ஃடிபென்ட் செய்திருந்தாலும், இரு அணிகளுக்கும் தலா ஒரு புள்ளியை நடுவர் வழங்கினார்.
ஆனால், இதற்கு தமிழ் தலைவாஸ் அணி ரிவ்யூ செய்தது. அதில், தமிழ் தலைவாஸ் அணியின் மன்ஜித் செய்த தவறால் தமிழ் தலைவாஸ் அணிக்கு வழங்கப்பட்ட ஒரு புள்ளி ரத்தானது. இதனால், தமிழ் தலைவாஸ் அணி 29-30 என ஒரு புள்ளி வித்தியாசத்தில் தபாங் டெல்லி அணியிடம் தோல்வி அடைந்தது. டெல்லி அணி இப்போட்டியில் வெற்றிபெற முக்கிய காரணமாக இருந்தவர், அந்த அணியின் நட்சத்திர ரைடர் நவீன்குமார். அவர் இப்போட்டியில் 8 புள்ளிகளை பெற்றார்.
முன்னதாக, புரோ கபடி லீக்கின் ஐந்தாவது சீசனிலும் தமிழ் தலைவாஸ் அணி 29-30 என்ற புள்ளிகள் கணக்கில் தபாங் டெல்லி அணியிடம் தோல்வி அடைந்தது குறிப்பிடத்தக்கது. இதைத்தொடர்ந்து, தமிழ் தலைவாஸ் அணி தனது அடுத்தப் போட்டியில் ஹரியான ஸ்டீலர்ஸ் அணியுடன் மோதவுள்ளது. இப்போட்டி வரும் 29ஆம் தேதி மும்பையில் தொடங்குகிறது.
