2020ஆம் ஆண்டுக்கான எஃப்ஐஹெச் ஹாக்கி ப்ரோ லீக் தொடர் வரும் 18ஆம் தேதி தொடங்குகிறது. இந்த ஆண்டு ஒலிம்பிக் தொடர் தொடங்கவிருக்கும் நிலையில், உலகின் தலைசிறந்த அணிகள் கலந்துகொள்ளும் தொடரை இந்திய நடத்துவது இந்திய அணிக்கு நல்ல அனுபவத்தைக் கொடுக்கும் என எதிர்பார்க்கப்படுகிறது.
இன்று இந்தத் தொடரில் பங்கேற்கவிருக்கும் இந்திய ஹாக்கி அணி அறிவிக்கப்பட்டுள்ளது. இந்த அணிக்கு மன்ப்ரீத் சிங் கேப்டனாகவும், ஹர்மன்ப்ரீத் சிங் துணை கேப்டனாகவும் நியமிக்கப்பட்டுள்ளனர். காயம் காரணமாக நீண்ட நாள்களாக அணியிலிருந்து விலகியிருந்த சிங்கிள்சனா சிங், சுமித் ஆகியோர் மீண்டும் அணிக்கு திரும்பியுள்ளனர்.
இதுகுறித்து இந்திய ஹாக்கி அணி பயிற்சியாளர் கிரகம் ரெய்ட் பேசுகையில், ''இந்தத் தொடரில் இந்திய அணியுடன் வருண் குமாரும் சேர்ந்து பயிற்சியில் ஈடுபடுவார். இந்தத் தொடரில் பங்கேற்கும் இந்திய அணியை அனுபவம் வாய்ந்த வீரர்களையே தேர்வு செய்துள்ளோம். சுமித், சிங்கிள்சனா ஆகியோருக்கு வாய்ப்பு வழங்கப்பட்டுள்ளது. இருவரும் உடல் தகுதியுடன் தீவிரப் பயிற்சியில் ஈடுபட்டுள்ளனர். குர்ஜந்த்தும் தீவிரப் பயிற்சியால் அணியில் இடத்தைப் பிடித்துள்ளார்.
உலகின் தலைசிறந்த மூன்று அணிகளுடன் போட்டியிடவுள்ளோம். ஒலிம்பிக் போட்டிகளை மனதில் வைத்தே அணியைத் தயார்செய்துவருகிறோம்'' என்றார்.
இந்திய அணி விவரம்: மன்ப்ரீத் சிங் (கேப்டன்), ஹர்மன்ப்ரீத் சிங் (துணை கேப்டன்), ஸ்ரீஜேஷ், கிருஷன் பஜதூர் பதக், குரிந்தர் சிங், சுரேந்தர் சிங், பிரேந்திர லக்ரா, ரூபிந்தர் பால் சிங், விவேக் சாகர் பிரசாத், சிங்கள்சனா சிங், நீலகண்ட சர்மா, சுமித், குர்ஜந்த் சிங், சுனில், லலித் குமார், மன்தீப் சிங், அக்ஷ்தீப் சிங், குர்சஹபிஜித் சிங், கோத்தஜித் சிங்.
இதையும் படிங்க: பிரவின் தாம்பேவால் ஐபிஎல்-லில் விளையாட முடியாது - பிசிசிஐ!
