கால்பந்து விளையாட்டில் தலைசிறந்த வீரராகத் திகழ்ந்தவர் பிரேசிலின் ரொனால்டினோ. இவர், தனது சிறப்பான ஆட்டத்தால் பிரேசில் அணிக்குப் பல வெற்றிகளைத் பெற்றுத் தந்துள்ளார். குறிப்பாக, 2002 ஃபிபா உலகக்கோப்பைக் கால்பந்துத் தொடரைப் பிரேசில் அணி வெல்ல மிக முக்கிய காரணமாக இருந்தார்.
சர்வதேச போட்டிகள் மட்டுமின்றி, பார்சிலோனா, ஏ.சி. மிலன் உள்ளிட்ட கிளப் அணிக்காகவும் விளையாடியுள்ளார். இந்த நிலையில், குழந்தைகள் தொண்டு நிகழ்ச்சி ஒன்றிக்காக, இவரும், இவரது சகோதரர் ராபர்டோ ஆகியோரும் கடந்த மார்ச் 4ஆம் தேதி பாராகுவே நாட்டிற்குச் சென்றனர்.
அப்போது போலி பாஸ்போர்ட்டை பயன்படுத்தி நாட்டிற்குள் நுழைந்ததாகக்கூறி, இவர்கள் இருவரையும் பாராகுவே காவல்துறையினர் மார்ச் 6ஆம் தேதி கைது செய்து சிறையில் அடைத்தனர். இதைத்தொடர்ந்து, போலி பாஸ்போர்ட் பயன்படுத்தியது தனக்குத் தெரியாதததால் ஜாமின் வழங்கக் கோரி ரொனால்டினோ தரப்பிலிருந்து, மூன்றுமுறை மனு தாக்கல் செய்யப்பட்டிருந்தது.
ஆனால், மூன்றுமூறையும் அவரது கோரிக்கையைப் பாராகுவே நீதிமன்றம் மறுத்துவிட்டது. இந்நிலையில், இந்த வழக்கை மீண்டும் விசாரித்த நீதிபதி, ரொனால்டினோவையும் அவரது சகோதரர் ராபர்டோ ஆகியோரையும் நிபந்தனை ஜாமினுடன் விடுதலை செய்ய உத்தரவிட்டுள்ளார்.
அதன் படி, அவர்கள் இருவரும் பாராகுவே நாட்டில் உள்ள நட்சத்திர விடுதியில் வீட்டுக் காவலில் வைக்கப்படவுள்ளனர். இந்த ஜாமினிற்காக 1.6 மில்லியன் டாலர் (இந்திய மதிப்பில் ரூ. 12 கோடியே 15 லட்சம் ரூபாய்) ரொனால்டினோ தரப்பிலிருந்து செலுத்தப்பட்டது. இதன்மூலம், 32 நாள் ரொனால்டினோவின் சிறைவாசம் முடிவுக்கு வந்தது.
இதையும் படிங்க: கரோனா: முன்னாள் கால்பந்து கிளப் தலைவர் உயிரிழப்பு
