லண்டன்: இந்திய அணி, இங்கிலாந்து அணிக்கு எதிராக 1 டெஸ்ட், 3 டி20, 2 ஒருநாள் போட்டிகள் என்ற மூன்று தொடர்களையும் விளையாட இங்கிலாந்திற்கு சுற்றுப்பயணம் மேற்கொண்டுள்ளது.
தற்போது, டெஸ்ட் போட்டி நடைபெற்று வரும் நிலையில், டி20 போட்டி ஜூலை 7ஆம் தேதி தொடங்குகிறது. இந்திய அணி கேப்டன் ரோஹித் சர்மாவுக்கு கரோனா தொற்று ஏற்பட்டதன் காரணமாக, அவரால் டெஸ்ட் போட்டியில் பங்கேற்க முடியவில்லை. இதனால், அவர் அடுத்து வரும் டி20 தொடரில் இருந்து அணியில் இணைந்து விடுவார் எனக் கூறப்பட்டது.
டி20, ஒருநாள் போட்டிக்கான அணியை பிசிசிஐ சமீபத்தில் வெளியிட்டிருந்தது. அதில், டி20, ஒருநாள் தொடர்களுக்கு ரோஹித் சர்மா கேப்டனாக தொடர்வார் எனவும் அறிவிக்கப்பட்டது. மேலும், டி20 தொடரில் விளையாடும் வீரர்கள், நார்தாம்ப்டன்ஷைர் அணியுடன் பயிற்சி போட்டியில் விளையாடி வருகின்றனர்.
நார்தாம்ப்டனில் பயிற்சி: இதைத்தொடர்ந்து, ரோஹித் சர்மாவுக்கு எடுக்கப்பட்ட பரிசோதனையில் கரோனா தொற்று இல்லை என்று நேற்று (ஜூலை 3) கண்டறியப்பட்டது. இந்நிலையில், நார்தாம்ப்டன் கவுண்டி மைதானத்தில் ரோஹித் சர்மா வலைப்பயிற்சியில் ஈடுபட்டார். சமீப காலமாக பெரிய அளவில் ஃபார்மில் இல்லாத ரோஹித், இந்தாண்டு இறுதியில் ஆஸ்திரேலியாவில் நடைபெற இருக்கும் டி20 உலகக்கோப்பைக்கு ஏற்றவாறு தயாராகி வருகிறார்.
யாருடன் ரோஹித்?: டி20 அணியில் ரோஹித் உடன் யார் ஓப்பனிங் இறங்குவது என்பது பெரும் குழப்பமான ஒன்றாக உள்ளது. கடந்தாண்டு நடைபெற்ற டி20 உலக்கோப்பை தொடரில் ரோஹித் - ராகுல் ஜோடி ஓப்பனிங்கில் ஆடியது.
ஆனால், இந்த ஜோடி பெரிய அளவில் சோபிக்கவில்லை. எனவே, ராகுலை ஒன்-டவுனில் இறக்கிவிட்டு, இஷான் கிஷன் உடன் ஓப்பனிங் ஆடலாம் என சேவாக் உள்பட பலரும் கருத்து தெரிவித்து வருகின்றனர்.
இப்போது இஷான்: தற்போது, கே.எல். ராகுல் காயம் காரணமாக அறுவை சிகிச்சை மேற்கொண்டு ஓய்வில் இருப்பதால், இந்த தொடரில் மட்டுமல்லாமல் அடுத்துவரும் மேற்கு இந்திய தீவுகளுக்கு எதிரான டி20 தொடரிலும் இஷான் ஓப்பனிங் இறங்குவார் எனத் தெரிகிறது.
எனவே, இந்த கூட்டணி கைக்கொடுத்தால், உலகக்கோப்பைத் தொடரில் இந்தியா சிறப்பாக செயல்படும் என ரசிகர்கள் ஆரூடம் தெரிவித்து வருவது குறிப்பிடத்தக்கது.
இதையும் படிங்க: ENG vs IND: பேர்ஸ்டோவ் சதத்தையும் சமாளித்தது இந்தியா - தொடரும் ஆதிக்கம்!
