துபாய் : 17வது ஐபிஎல் கிரிக்கெட் தொடர் அடுத்த ஆண்டு மார்ச் முதல் மே வரை நாட்டின் பல்வேறு நகரங்களில் நடத்த திட்டமிடப்பட்டு உள்ளது. தொடருக்கு முன்னதாக வீரர்கள் தக்கவைப்பு, விடுவிப்பு பணிகள் மேற்கொள்ளப்பட்டன. இதையடுத்து 2024ஆம் ஆண்டு ஐபிஎல் தொடருக்கான மினி ஏலம் துபாயில் இன்று (டிச. 19) நடைபெற்றது.
நட்சத்திர வீரர்களை ஏலம் எடுப்பதில் ஐபிஎல் அணி உரிமையாளர்களிடையே கடும் போட்டி நிலவியது. நடப்பு ஐபிஎல் மினி ஏலத்தின் ஆஸ்திரேலிய வீரர்களுக்கு கடும் கிராக்கி நிலவியது. அண்மையில் உலக கோப்பை கிரிக்கெட் தொடரை ஆஸ்திரேலிய அணி 6வது முறையாக கைப்பற்றிய நிலையில், உலக கோப்பை அணியில் இடம் பெற்ற வீரர்களுக்கு கடும் கிராக்கி காணப்பட்டது.
ஆஸ்திரேலிய வீரர்களை ஏலம் எடுப்பதில் பெரும்பாலான அணி உரிமையாளர்கள் மல்லுக்கட்டினர். அதனடிப்படையில் 2024 சீசனில் ஆஸ்திரேலிய வீரர்கள் அதிகபட்ச தொகைக்கு ஏலம் போய் மற்ற நாட்டு வீரர்களை மலைக்கச் வைத்து உள்ளனர். ஆஸ்திரேலிய வேகப்பந்து வீச்சாளர் மிட்செல் ஸ்டார்க்கை 24 கோடியே 75 லட்ச ரூபாய்க்கு கொல்கத்தா நைட் ரைடர்ஸ் அணி விலைக்கு வாங்கியது.
அவரைத் தொடர்ந்து மற்றொரு ஆஸ்திரேலிய வீரரும் உலக கோப்பை கிரிக்கெட் தொடரில் அந்த அணியை வழிநடத்திச் சென்றவருமான பேட் கம்மின்ஸ் 20 கோடியே 50 கோடி ரூபாய்க்கு ஐதராபாத் சன் ரைசர்ஸ் அணிக்கு ஏலம் போனார். அவரைத் தொடர்ந்து நியூசிலாந்து வீரர் டேரி மிட்செல்லை 14 கோடி ரூபாய்க்கு சென்னை சூப்பர் கிங்ஸ் அணி எடுத்துக் கொண்டது.
4வது இடத்தில் இந்திய வீரர் ஹர்ஷல் பட்டேல் 11 கோடியே 75 லட்ச ரூபாய்க்கு பஞ்சாப் கிங்ஸ் அணியால் விலைக்கு வாங்கப்பட்டார். அதிக விலைக்கு ஏலம் போன டாப் 5 வீரர்கள் பட்டியலில் உள்ள ஒரே இந்தியர் ஹர்சல் பட்டேல் என்பது குறிப்பிடத்தக்கது. 5வது இடத்தில் வெஸ்ட் இண்டீஸ் வீரர் அல்ஜாரி ஜோசப் 11 கோடியே 50 லட்ச ரூபாய்க்கு ராயல் சேலஞ்சர்ஸ் பெங்களூரு அணிக்கு ஏலம் போனார்.
இதையும் படிங்க : ஐபிஎல் வரலாற்றில் அதிக விலைக்கு ஏலம் போன ஸ்டார்க்.. எவ்வளவு தெரியுமா?
