அகமதாபாத்: நடப்பு உலகக் கோப்பை கிரிக்கெட் தொடரின் நான்கு போட்டிகளில் இந்திய அணியின் பிளேயிங் லெவனில் முகமது ஷமி இடம் பெறவில்லை. கடந்த அக்டோபர் 19ஆம் தேதி வங்கதேசத்திற்கு எதிரான லீக் ஆட்டத்தில் ஆல் ரவுண்டர் ஹர்திக் பாண்ட்யா காயம் காரணமாக வெளியேறியதால், அவருக்குப் பதிலாக முகமது ஷமி அணிக்குள் நுழைந்தார்.
தனக்கு கிடைத்த வாய்ப்பை சரியாகப் பயன்படுத்திக் கொண்ட ஷமி, இதுவரை விளையாடி 6 போட்டிகளில் 23 விக்கெட்டுகளை வீழ்த்தி உள்ளார். இந்திய அணியின் நட்சத்திர நாயகனாக வலம் வரும் முகமது ஷமி விக்கெட்டுகளை வீழ்த்துவது மட்டுமின்றி, குறைந்த ரன்களை மட்டுமே விட்டுக் கொடுத்துள்ளார்.
அவரது எகானமி 5.01 ஆகும். மேலும், அதிக விக்கெட்டுகளை எடுத்த பந்து வீச்சாளர்கள் பட்டியலில் முதல் இடத்தில் உள்ளார். இவருக்கு அடுத்தபடியாக ஆஸ்திரேலிய அணியின் வீரர் ஆடம் ஜாம்பா 22 விக்கெட்டுகளுடன் 2ஆம் இடத்தில் உள்ளார்.
"எனது பந்து வீச்சில் அசாதாரணமானது என்று எதுவுமில்லை, நான் எப்போதும் சூழ்நிலைகளுக்கு ஏற்றவாறு பந்து வீசுவேன். மைதானத்தின் தன்மையைப் பொறுத்து பந்து ஸ்விங் ஆகிறதா, இல்லையா என்பதை கவனித்து பந்துகளை வீசுவேன். சில நேரங்களில் பந்து ஸ்விங் ஆகவில்லை என்றால், ஸ்டம்பை குறிவைத்து பந்து வீசுவேன்.
அப்படி ஸ்டம்பை குறிவைத்து பந்துகளை வீசும்போது, பேட்ஸ்மேன்கள் விளையாட முற்படுவார்கள். அப்போது விக்கெட் கிடைக்கும். அதேபோல் பேட்ஸ்மேன்களுக்கு எட்ஜ் வாங்கும் பகுதியில் அதிகமாக பிட்ச் செய்து, டிரைவ் ஆட வைக்க முயல்வேன்” என தெரிவித்தார்.
தொடர்ந்து ஷமியின் பந்து வீச்சு குறித்து முன்னாள் இந்திய அணியின் தலைமை பயிற்சியாளர் ரவி சாஸ்திரி கூறுகையில் “முகமது ஷமி பந்து வீச ஓடி வரும்போது, அதனை எதிர்கொள்ளும் பேட்ஸ்மேன்களுக்கு வாழ்த்துதான் சொல்ல வேண்டும். இந்த உலகக் கோப்பை கிரிக்கெட் தொடரில் தொடர்ச்சியாக சரியான லெந்தில் பந்து வீசும் ஒரே வீரர் ஷமிதான்" என பாராட்டியுள்ளார்.
ரோகித் சர்மா தலைமையிலான இந்திய அணி நாளை (நவ.19) நடைபெறவுள்ள உலகக் கோப்பை இறுதிப் போட்டியில் 5 முறை சாம்பியனான ஆஸ்திரேலியா அணியை எதிர்கொள்கிறது. இதற்காக முகமது ஷமி தீவிரமான பயிற்சியில் ஈடுபட்டுள்ளார்.
இதையும் படிங்க: ஹர்திக் பாண்ட்யா காயம்.. அணியில் நுழைந்த ஷமி! திருப்பிப் போட்ட தருணம்! எப்படி நடந்தது?
