இந்தியா, இங்கிலாந்து, ஆஸ்திரேலியா ஆகிய அணிகள் பங்கேற்றுள்ள முத்தரப்பு மகளிர் கிரிக்கெட் டி20 தொடர் ஆஸ்திரேலியாவில் நடந்து வருகிறது. இதன் நான்காவது போட்டியில் இந்தியா - இங்கிலாந்து அணிகள் மோதின. மூன்று அணிகளும் தலா ஒரு போட்டியில் வென்றிருந்ததால், இந்தப் போட்டி மீது ரசிகர்களுக்கு அதீத எதிர்பார்ப்பு ஏற்பட்டிருந்தது. இதில் டாஸ் வென்ற இங்கிலாந்து கேப்டன் க்நைட் பந்துவீச்சைத் தேர்வு செய்தார்.
பின்னர் இந்திய அணிக்காக ஷஃபாலி வர்மா - ஸ்மிருதி மந்தனா இணை தொடக்கம் கொடுத்தது. முதல் விக்கெட்டுக்கு 39 ரன்கள் சேர்த்த நிலையில், இளம் வீராங்கனை ஷஃபாலி வர்மா 8 ரன்களில் ஆட்டமிழந்தார். இதையடுத்து அதிரடியாக ஆடிய ஸ்மிருதி மந்தனா 45 ரன்களிலும், ஜெமிமா ரோட்ரிக்ஸ் 23 ரன்களிலும், கேப்டன் ஹர்மன்ப்ரீத் கவுர் 14 ரன்களிலும் ஆட்டமிழந்து பெவிலியன் திரும்ப 20 ஓவர்களில் இந்திய அணி 6 விக்கெட்டுகள் இழப்பிற்கு 123 ரன்கள் சேர்த்தது. இங்கிலாந்து அணி சார்பாக ஆன்யா ஷ்ரப்சோல் 3 விக்கெட்டுகளை வீழ்த்தினார்.
பின்னர் களமிறங்கிய இங்கிலாந்து அணியில் ஏமி எலன் - டேனியல் இணை தொடக்கம் கொடுத்தது. அதில் ஏமி 1 ரன்னிலும், டேனியல் 14, ப்ரண்ட் 8 ரன்களிலும் ஆட்டமிழக்க இங்கிலாந்து அணி 28 ரன்களில் மூன்று முக்கிய விக்கெட்டுகளை இழந்து தடுமாறியது. இதையடுத்து அதிரடியாக ஆடிய நடாலி ஒருமுனையில் வேகமாக ரன்களைச் சேர்க்க, அவருக்குத் துணையாக கேப்டன் க்நைட் நிதான ஆட்டத்தை வெளிப்படுத்தினார்.
பின்னர் க்நைட் 18 ரன்களில் ஆட்டமிழக்க, நடாலி அரைசதம் கடந்து கெய்க்வாட் பந்தில் பெவிலியன் திரும்பினார். இறுதியாக வில்சன் - லாரன் இணை இங்கிலாந்து அணியை வெற்றிபாதைக்கு அழைத்துச் சென்றது. இங்கிலாந்து அணி 18.5 ஓவர்களில் 6 விக்கெட்டுகளை இழந்து 124 ரன்களை எடுத்தது. வில்சன் 20 ரன்கள் எடுத்து கடைசி வரை களத்தில் இருந்தார். இந்திய அணி சார்பாக ஆன்யா ஸ்ரப்சோல் ஆட்டநாயகியாகத் தேர்வு செய்யப்பட்டார்.
நாளை நடக்கவுள்ள போட்டியில் இந்திய அணி ஆஸ்திரேலியாவை எதிர்கொள்ளவுள்ளது.
இதையும் படிங்க: முக்கிய வீரர்களின் தொடர் காயங்கள்... ஓய்வில்லாமல் தொடர்ந்து செயல்படும் இந்திய அணி!
