சர்வதேச கிரிக்கெட் போட்டிகளில் போதுமான வாய்ப்பின்றி இருக்கும் வீரர்கள் தங்களது அணியிலிருந்து விலகி, மற்ற நாடுகளுக்காக விளையாடுவது வழக்கம்தான். இதற்கு சிறந்த எடுத்துக்காட்டு இயான் மோர்கன். தனது ஆரம்பக் காலத்தில் அயர்லாந்து அணிக்காக விளையாடிய இவர், தற்போது 10 ஆண்டுகளுக்கு மேலாக இங்கிலாந்து அணிக்காக விளையாடிவருகிறார்.
தற்போது அந்த வரிசையில் தென் ஆப்பிரிக்க அணியின் சுழற்பந்துவீச்சாளர் டேன் பீட் இணையவுள்ளார். கடந்தாண்டு அமெரிக்க அணிக்கு ஒருநாள் போட்டியில் விளையாடுவதற்கான அந்தஸ்து கிடைத்தது. இதனால், தான் உலகக்கோப்பை போட்டியில் விளையாட வேண்டும் என்ற கனவுக்காக அவர் தென் ஆப்பிரிக்க அணியிலிருந்து விலகி அமெரிக்க அணியில் விளையாட ஒப்பந்தம் செய்துகொண்டுள்ளார்.
தென் ஆப்பிரிக்க டெஸ்ட் அணிக்காக 2014இல் அறிமுகமான இவர், இதுவரை ஒன்பது டெஸ்ட் போட்டிகளில் விளையாடியுள்ளார். இருப்பினும் ஒருநாள், டி20 போட்டிகளுக்கான தென் ஆப்பிரிக்க அணியில் ஷாம்சி, கேஷவ் மகராஷ் ஆகியோர் சிறப்பாக விளையாடிவருதால் இவருக்கு அணியில் வாய்ப்பு கிடைப்பது மிகவும் கடினம். இதைக் கருத்தில் கொண்டே இவர் இந்த முடிவை எடுத்துள்ளார் எனத் தெரிகிறது.
அமெரிக்காவில் நடைபெறவுள்ள மைனர் டி20 லீக் தொடரில் விளையாடுவதன் மூலம் விரைவில் தனக்கு அமெரிக்க அணியில் வாய்ப்பு கிடைக்கும் என நம்பிக்கையுடன் தெரிவித்துள்ளார். இதுகுறித்து அவர் கூறுகையில், "எனது கிரிக்கெட் வாழ்வை மேம்படுத்தும் வகையில் எனக்கு கிடைத்த இந்த வாய்ப்பை நான் இழக்க விரும்பவில்லை. அதனாலேயே நான் இந்த முடிவை எடுத்தேன். இருப்பினும் இந்த முடிவை எடுக்க சற்று கடினமாகவே இருந்தது" என்றார்.
தென் ஆப்பிரிக்க அணிக்காக இதுவரை ஒன்பது டெஸ்ட் போட்டிகளில் விளையாடி பவுலிங்கில் 26 விக்கெட்டுகளும் பேட்டிங்கில் 131 ரன்களும் எடுத்துள்ளார். முன்னதாக, அமெரிக்காவில் பல ஆண்டுகளாக வசித்துவரும் தென் ஆப்பிரிக்க அணியைச் சேர்ந்த முன்னாள் பந்துவீச்சாளர் பால் ரஸ்டி தெரான், கடந்தாண்டு ஒருநாள் போட்டிக்கான அமெரிக்க அணியில் அறிமுகமானார் என்பது குறிப்பிடத்தக்கது.
இதையும் படிங்க: ‘உலகக்கோப்பைத் தொடரில் தோனியின் அனுபவம் இந்திய அணிக்கு தேவை’
