விராட் கோலி தலைமையிலான இந்திய அணி வெஸ்ட் இண்டீஸில் சுற்றுப்பயணம் மேற்கொண்டு மூன்று டி20, மூன்று ஒருநாள், இரண்டு டெஸ்ட் போட்டிகள் கொண்ட தொடரில் விளையாடிவருகிறது. இதில், அமெரிக்காவின் ஃபுளோரிடாவில் நேற்று நடைபெற்ற முதல் டி20 போட்டியில் இந்திய அணி ஆறு விக்கெட்டுகள் வித்தியாசத்தில் வெற்றிபெற்றது. இந்நிலையில், இவ்விரு அணிகளுக்கு இடையிலான இரண்டாவது டி20 போட்டி இன்று அதே மைதானத்தில் நடைபெறவுள்ளது.
இந்தப் போட்டியில் இந்திய அணி வெற்றிபெற்றால் டி20 தொடரை கைப்பற்றும். உலகக்கோப்பைக்கு பிறகு இந்திய அணி விளையாடும் முதல் தொடர் என்பதால், இந்திய அணி மீது எதிர்பார்ப்பு பன்மடங்கு அதிகரித்துள்ளது. நேற்று நடைபெற்ற முதல் டி20 போட்டியின் மூலம் கிரிக்கெட்டுக்கு அறிமுகமான நவ்தீப் சைனி சிறப்பாக பந்துவீசினார். ஃப்ளாட் பிட்ச் அதிக ரன்மழை பொழியும் என எதிர்பார்க்கப்பட்ட நிலையில், நேற்று விக்கெட் மழைதான் பொழிந்தது.
நவ்தீப் சைனி, கலீல் அகமது, குருணால் பாண்டியா, ஜடேஜா, வாஷிங்டன் சுந்தர் ஆகியோரது பந்துவீச்சை எதிர்கொள்ள முடியாமல் வெஸ்ட் இண்டீஸ் அணி 95 ரன்களை மட்டுமே எடுத்தது. டி20 கிரிக்கெட் ஸ்பெஷலிஸ்ட் என்று தனிப்பெயர் பெற்ற வெஸ்ட் இண்டீஸ் அணியின் இந்த ஆட்டத்திறனைக் கண்டு பலரும் அதிர்ச்சி அடைந்தனர்.
இதனால், இன்றையப் போட்டியில் வெஸ்ட் இண்டீஸ் அணியில் ஒரு சில மாற்றங்கள் செய்யப்படலாம் என எதிர்பார்க்கப்படுகிறது. அதேசமயம், இந்திய அணியில் எந்தவித மாற்றமும் இல்லாமல் களமிறங்கும் என எதிர்பார்க்கப்படுகிறது. பந்துவீச்சில் இந்திய தேர்ச்சி பெற்றாலும், பேட்டிங்கில் மிகவும் மோசமாகத்தான் செயல்படுகிறது.
96 ரன்கள்தான் இலக்கு என்றாலும் இந்திய அணி, வெஸ்ட் இண்டீஸ் அணியின் பந்துவீச்சை எதிர்கொள்ள தடுமாறுகிறது. இருப்பினும், ரோகித் சர்மா கோலி இருவரின் நிதானமான ஆட்டத்தால் இந்திய அணி தோல்வியிலிருந்து தப்பியது. ஆனாலும், ரோகித் சர்மா சுனில் நரேனின் பந்துவீச்சிலும், கோலி பொல்லார்ட்டின் பந்துவீச்சிலும் ரன் குவிக்க தடுமாறுகின்றனர்.
ஷிகர் தவான், ரிஷப் பந்த் கைகொடுத்தால் அணிக்கு நன்றாக இருக்கும். ஏனெனில் ஷிகர் தவான், ரிஷப் பந்த், குருணால் பாண்டியா, மனீஷ் பாண்டே ஆகியோர் நேற்று சொற்ப ரன்களில் ஆட்டமிழந்தனர்.
இந்திய அணி இதுவரை அமெரிக்காவில் டி20 தொடரை வென்றதில்லை. முன்னதாக 2016இல் இரண்டு போட்டிகள் கொண்ட தொடரில் இந்திய அணி 1-0 என்ற கணக்கில் தொடரை வெஸ்ட் இண்டீஸிடம் தோற்றது. அந்தத் தொடரின் இரண்டாவது போட்டி மழையால் ரத்தானது.
மூன்று வருடங்களுக்குப் பிறகு மீண்டும் இந்திய அணி அமெரிக்காவில் டி20 தொடரில் விளையாடிவருவதால் இம்முறையாவது தொடரை வெல்ல வேண்டும் என்ற முனைப்போடு இன்றைய போட்டியில் களமிறங்கவுள்ளது. அதேசமயம், நேற்று தோல்வி அடைந்ததற்கு வெஸ்ட் இண்டீஸ் அணி நிச்சயம் இன்றையப் போட்டியில் தக்க பதிலடி கொடுத்தால், ஆட்டம் விறுவிறுப்புக்கு பஞ்சமிருக்காது எனத் தெரிகிறது.
இவ்விரு அணிகளுக்கு இடையிலான இரண்டாவது டி20 போட்டி இந்திய நேரப்படி இன்று இரவு 8 மணிக்கு சோனி டென் 1, சோனி டென் 3 சேனலில் ஒளிப்பரப்பாகவுள்ளது.
