கிரிக்கெட்டில் 'தல' என்று அழைக்கப்படும் இந்திய அணியின் முன்னாள் கேப்டன் மகேந்திர சிங் தோனி உலகக்கோப்பைக் கிரிக்கெட் போட்டி முடிந்தவுடன் தனது ஓய்வை அறிவிப்பார் என எதிர்பார்க்கப்பட்டது. அவரது ஓய்வு குறித்து பல்வேறு தரப்பினர் தங்களது கருத்துகளை தெரிவித்துவருகின்றனர்.
இந்த நிலையில், ஐபிஎல் தொடரின் கடந்த சீசனில் தோனிக்கு தவறாக ரன் அவுட் கொடுக்கப்பட்டதற்கு, சென்னையைச் சேர்ந்த சிறுவன் கிருதிக்கேஷ் மூன்றாவது நடுவரை திட்டி வசைபாடிய காணொலி சமூக வலைதளங்களில் வைரலாகப் பரவியது. தோனியின் 'டை ஹார்டு' ரசிகனாக விளங்கும் அச்சிறுவனிடம் தோனியின் ஓய்வு குறித்து நாம் பேட்டி எடுத்தோம். அவற்றின் கேள்வி-பதில் தொகுப்பு கீழே கொடுக்கப்பட்டுள்ளது.
கேள்வி: தோனி ஏன் ஓய்வுபெறக் கூடாது?
- பதில்: தோனி இந்திய அணிக்காக பல வெற்றிகளை தேடித் தந்துள்ளார். அவர் முக்கியமான வீரர். அவர் இந்திய அணியிலிருந்து ஓய்வுபெற்றால் அணிக்குதான் பெரிய இழப்பு.
கேள்வி: தோனிக்கு பிறகு இளம் வீரர்கள் வருகை தந்தால் அது அணிக்குதானே நல்லது?
- பதில்: தோனி ஓய்வுக்குப் பிறகு பல புதிய வீரர்கள் வருவது நல்ல விஷயம்தான். ஆனால் தோனியை போல் எல்லோராலும் ஆகமுடியாது. கிரிக்கெட் என்றாலே தோனிதான். நீங்க யார் ஃபேன் அப்படின்னு கேட்டால் நிறைய பேர்... 'நான் தோனி ஃபேன்' என்றுதான் சொல்வார்கள். அவர் இருந்தால்தான் இந்திய அணி பவர்ஃபுல்லாக இருக்கும். அவர்போல் வருவது கஷ்டம்தான்.
கேள்வி: தோனியின் ஃபேனாக இந்த உலகக்கோப்பையில் அவரது ஃபார்ம் குறித்து உங்கள் கருத்து?
- பதில்: தோனி இந்த உலகக்கோப்பை போட்டியில் சற்று தடுமாறினார். சில போட்டிகளில் சரியாக ஆடவில்லை என்பதற்காக அவர் ஃபார்ம் அவுட் என்று சொல்ல முடியாது. இறுதிப் போட்டியில் தோனி ஆடுகிறார் என்று நாம் டிவியை ஆன் செய்யும் நிலை வரும். சில தொடர்களில் அவர் முதலில் சரியாக ஆட மாட்டார். ஆனால் இறுதிப் போட்டியின்போது அவர் ஃபார்முக்கு வந்துவிடுவார். தோனியின் ரசிகர்
கேள்வி: தோனி ஓய்வு அறிவித்தால் உங்களது மனநிலை எப்படி இருக்கும்?
- பதில்: தோனி ஓய்வு முடிவை அறிவித்தால் எனக்கு மிகவும் கஷ்டமாக இருக்கும். இந்திய அணியில் தோனி தவிர விராட் கோலி, சாஹல், பும்ரா ஆகியோரை பிடிக்கும். கோலியை விட தோனிக்கு கேப்டன்சியில் அதிக அனுபவம் இருக்கிறது. அவர் கேப்டன் கூல்!
கேள்வி: தோனி ஒருவேளை உங்க வீட்டுக்கு வந்தா உங்கள் ரியாக்ஷன் எப்படி இருக்கும்?
- பதில்: தோனி, என் வீட்டுக்கு வந்தால் அவரது காலில் விழுந்து ஆசிர்வாதம் வாங்குவேன். பின்னர் ஏன் ஓய்வு எடுத்தீர்கள்? நீங்கள் இல்லாமல் கிரிக்கெட் பார்க்கவே பிடிக்கவில்லை என்று சொல்வேன். இந்திய அணியை பார்க்கவே பிடிக்கவில்லை என்று சொல்வேன். தோனி
கேள்வி: தோனி ஓய்வுபெற்றால் நீங்க கிரிக்கெட் பார்க்கமாட்டீர்களா?
- பதில்: அப்படி இல்லை. தோனி அணியில் இருந்தால் போட்டி சுவாரஸ்யமாக இருக்கும். இன்றைய போட்டிகளில் கோலி அவுட் ஆனால் கூட தல தோனி இருக்கிறார் என்று கெத்தாக இருக்கலாம். ஆனால், அவர் ஓய்வுபெற்றால் அந்த நம்பிக்கை இருக்காது.
