இந்தியாவில் சுற்றுப்பயணம் மேற்கொண்டுள்ள வெஸ்ட் இண்டீஸ் அணி மூன்று டி20, மூன்று ஒருநாள் போட்டிகள் கொண்டத் தொடரில் விளையாடி வருகின்றது. இதில் நேற்று நடைபெற்ற மூன்றாவது டி20 போட்டியில் இந்திய அணி 67 ரன்கள் வித்தியாசத்தில் வெஸ்ட் இண்டீஸ் அணியை வீழ்த்தி, டி20 தொடரை 2-1 என்ற கணக்கில் கைப்பற்றியது.
இந்நிலையில் இவ்விரு அணிகளுக்கும் இடையிலான முதலாவது ஒரு நாள் போட்டியானது வரும் டிசம்பர் 15ஆம் தேதி சென்னையில் உள்ள சேப்பாக்கம் மைதானத்தில் நடைபெறவுள்ளது. இதனையடுத்து மும்பையிலிருந்து விமானம் மூலம் இந்தியா மற்றும் மேற்கிந்தியத் தீவுகள் அணியைச் சேர்ந்த வீரர்கள் சென்னை வந்தடைந்தனர்.
மேலும், இந்திய அணியின் நட்சத்திரத் தொடக்க வீரர் ஷிகர் தவான் காயம் காரணமாக தொடரிலிருந்து விலகியுள்ளதால், அவருக்குப் பதிலாக இந்திய டெஸ்ட் அணியின் தொடக்க வீரர் மயங்க் அகர்வால் அணியில் சேர்க்கப்பட்டுள்ளார். இதனால் சென்னையில் நடைபெறும் முதல் ஒருநாள் போட்டியில் மயங்க் களமிறங்குவார் என ரசிகர்களால் எதிர்பார்க்கப்படுகிறது.
இதையும் படிங்க:ஆஃப்கானிஸ்தான் கிரிக்கெட் போர்டுக்கு எச்சரிக்கை விடுத்த முன்னாள் கேப்டன்!
