தாய்லாந்து ஓபன்: சாம்பியன் பட்டம் வென்ற கரோலினா, ஆக்செல்சன்!

தாய்லாந்து ஓபன் பேட்மிண்டன் தொடரின் மகளிர் ஒற்றையர் பிரிவில் ஸ்பெயினின் கரோலினா மரின், ஆடவர் பிரிவில் டென்மார்க்கின் விக்டர் ஆக்செல்சன் ஆகியோர் சாம்பியன் பட்டத்தை வென்று அசத்தினர்.

தாய்லாந்தில் நடைபெற்று வரும் தாய்லாந்து ஓபன் பேட்மிண்டன் தொடர் நேற்றுடன் (ஜன.17) நிறைவடைந்தது. மகளிர் ஒற்றையர் பிரிவு இறுதிச்சுற்று ஆட்டத்தில் ஸ்பெயின் நாட்டின் கரோலினா மரின் - சீனாவின் தாய் ஜூ யிங்கை எதிர்கொண்டார்.

பரபரப்புடன் நடைபெற்ற இப்போட்டியின் கரோலினா மரின் 21-09, 21-16 என்ற நேர் செட் கணக்கில் தாய் ஜூ யிங்கை வீழ்த்தி சாம்பியன் பட்டத்தை தன்வசமாக்கினார்.

ஆடவர் ஒற்றையர் பிரிவு இறுதிச்சுற்றில் டென் மார்க்கின் விக்டர் ஆக்செல்சன் - ஹாங்காங்கின் என்.ஜி. கா லாங் அங்கஸுடன் மோதினார். இப்போட்டியின் முடிவில் விக்டர் ஆக்செல்சன் 21-14, 21-14 என்ற நேர் செட் கணக்கில் லாங் அங்கஸை வீழ்த்தி சாம்பியன் பட்டத்தைக் கைப்பற்றினார்.

இதில் வெற்றி பெற்றவர்களுக்கு பரிசுத் தொகையாக ரூ. 50 லட்சமும், இரண்டாம் இடம் பிடித்தவர்களுக்கு பரிசுத் தொகையாக ரூ. 25 லட்சமும் வழங்கப்பட்டது.

இதையும் படிங்க: IND vs AUS: சிராஜை பாராட்டிய சச்சின்!