செந்நாய் வேட்டைக்காரனாக மாறிய 'கழுகு 2'

திருடர்களாக இருந்து வேட்டைக்காரர்களாக மாறும் இருவரின் வாழ்க்கை சிறகை விரிக்கிறது 'கழுகு 2'.

2012ஆம் ஆண்டு கிருஷ்ணா, பிந்துமாதவி, தம்பி ராமையா, கருணாஸ் என பலர் நடிப்பில் வெளியான படம் 'கழுகு'. தற்போது அப்படத்தின் இரண்டாம் பாகம் 'கழுகு 2' வெளியாகியுள்ளது.

வேட்டைக்காரர்கள் கிருஷ்ணா - காளி வெங்கட்

திருடி வாழ்க்கை நடத்திக் கொண்டிருக்கும் கிருஷ்ணா, காளிவெங்கட் ஒரு வழக்கில் காவல்துறையிடம் சிக்கிக்கொண்டனர். அவர்கள் காவல்துறையின் பிடியில் இருந்து தப்பிச் செல்கின்றனர். கொடைக்கானலில் உள்ள காடுகளில் மரம் வெட்ட ஒரு குழு டெண்டர் எடுத்த நிலையில் அவர்களுக்கு செந்நாய் பெரும் தொந்தரவாக அமைகிறது. ஒரு வேட்டைக்காரனை தேடும் பணியில் எம்.எஸ் பாஸ்கர் இறங்குகிறார். அப்போது காட்டுப் பகுதியில் இருந்த கிருஷ்ணாவையும், காளி வெங்கட்டையும் வேட்டைக்காரர்களாக எண்ணி அழைத்து வருகிறார். இது கிருஷ்ணாவுக்கும், காளிக்கும் சாதகமாக அமைவதால் அவர்களும் வேட்டைக்கார்களாக நடிக்க ஆரம்பிக்கின்றனர்.

பிந்து மாதவியை கண்களால் கைது செய்ய முயற்சிக்கும் கிருஷ்ணா

எம்.எஸ் பாஸ்கரின் மகளாக பிந்துமாதவி வருகிறார். தமிழ்சினிமாவின் விதி மீறமால் பிந்து மாதவியை கிருஷ்ணா கண்டதும் காதல் வையப்படுகிறார். இதற்கிடையில் கிருஷ்ணா காளிவெங்கட் காட்டிற்குள்ளும் மிகப்பெரிய திருட்டு ஒன்றை செய்கிறார்கள். அது என்ன திருட்டு? கிருஷ்ணாவின் காதல் கைகூடியதா? செந்நாய்களை எப்படி எதிர்கொண்டார்கள் என்பதுதான் மீதிக்கதை.

கிருஷ்ணா தனது கதாபாத்திரத்திற்கு சரியான உயிரோட்டத்தைக் கொடுத்துள்ளார். காளிவெங்கட்டுடன் அட்ராசிட்டி செய்வது, காதல் வந்ததும் உருகுவது என தனக்கே உண்டான பாணியில் செய்துள்ளார். காளி வெங்கட் கேரக்டர் கொஞ்சம் சிக்கலான கேரக்டர்தான். படம் முழுக்க வந்தாலும் அவர் நல்லவரா கெட்டவரா என முழுமையாகக் காட்டத் தவறியிருக்கிறார் இயக்குநர்.

கிருஷ்ணா - பிந்துமாதவி

‘கழுகு’ முதல் பாகத்தில் மலைகளில் நடக்கும் தற்கொலை உடல் கண்டுபிடிக்கும் குழு என ஆச்சர்யமாக பார்க்கவைத்த இயக்குநர் இந்தப் படத்தில் கிராபிக்ஸ் செந்நாய்களை நம்பி சற்றே தடுமாறிவிட்டார். படமும் சுவாரஸ்யமான காட்சிகள் எதுவும் இல்லாமல் துவண்டு தொங்கி நிற்கிறது. தம்பி ராமையா, கருணாஸ் என்னும் மிகப்பெரிய பலமான கூட்டணியாக முதல் பாகத்தை தாங்கி நிற்க, இரண்டாம் பாகம் ஏதுமற்ற காட்சிகளாகக் கடக்கிறது.

காதலை வெளிபடுத்தும் முயற்சியல் கிருஷ்ணா

படத்திற்கு இரண்டு பலங்கள் ராஜா பட்டார்ச்சர்ஜீயின் ஒளிப்பதிவு, யுவன் ஷங்கர் ராஜாவின் பின்னணி இசை ஒரு படம் வெற்றி எனில் அதை அப்படியே விட்டு விடுவதே சாலச்சிறந்தது. அதன் டைட்டிலை மீண்டும் கொண்டுவந்து எதிர்பார்ப்பை உருவாக்கி அதில் உள்ள எதுவும் இதில் இல்லை என சொல்ல வைக்கவே தற்போதைய சினிமா உலகம் மெனக்கெடுகிறதோ என தோன்றுகிறது.

'கழுகு 2' தனது சிறகை விரிக்க சற்றே தயங்கியது போல..!