அறிமுக இயக்குநர் விவேக் இளங்கோவன் இயக்கியுள்ள 'வெள்ளைப்பூக்கள்' படத்தில் நடிகர் விவேக் ஓய்வு பெற்ற காவல் துறை அலுவலராக நடித்துள்ளார். சமீபத்தில் வெளியான இப்படத்தின் டீசர் ரசிகர்களின் மனதைக் கவர்ந்தது. இந்நிலையில் வெள்ளைப்பூக்கள் திரைப்படம் ஏப்ரல் 19ஆம் தேதி வெளியாகிறது. மேலும், சென்னையில் செய்தியாளர்கள் சந்திப்பு நிகழ்ச்சி நடைபெற்றது.
அப்போது பேசிய நடிகர் விவேக், 'எனது 32 ஆண்டு கால திரையுலக வாழ்க்கையில் வெள்ளைப்பூக்கள் போன்ற படத்தில் நான் நடித்ததில்லை என பத்திரிகை நண்பர்கள் பாராட்டி வருகின்றனர். இந்தப் படத்தில் முழுவதுமாக என்னுடைய தோற்றம் டயலாக் டெலிவரி எல்லாமே வேறு மாதிரியாக வித்தியாசமாக இருந்தது. இதில் நடித்தபோது இந்த படத்தை நானே வித்தியாசமாக உணர்ந்தேன். நகைச்சுவை நடிகர் விவேக்கிற்குள்ளும் இப்படி ஒரு சீரியஸான ஒரு நடிகர் இருக்கிறார் என்பதை பார்க்கையில் பிரமிப்பாக உள்ளது.
இந்தப் படத்தில் நான் வேண்டாம் சத்யராஜ் போன்ற நடிகர்கள் நடித்தால் நன்றாக இருக்கும் என்று தெரிவித்தேன். ஆனால் தயாரிப்பாளர் போலீஸ் வேடத்தில் அவர் அதிகமாக நடித்திருக்கிறார். நீங்கள் நடித்தால் புதுசாக இருக்கும் என்றார். ஏதோ இயக்குநருக்கு நான் நடித்தால் நன்றாக இருக்கும் என்று நகைச்சுவை நடிகரை தவிர மற்றொரு விவேக்கை கொண்டு வரவேண்டும் என்று அவர் நினைத்திருக்கலாம். அது நடந்து விட்டது' என்று அவர் தெரிவித்தார்.
இது போன்ற படங்களில் நடிப்பீர்களா? என செய்தியாளர்கள் கேட்டதற்கு, 'கண்டிப்பாக வாய்ப்புகள் வந்தால் இது போன்ற படங்களில் நான் நடிப்பேன். இந்தப் படத்தில் வரும் ருத்ரன் டிஐஜி கேரக்டரை முதன்மைப்படுத்தி பார்ட் 1, பார்ட் 2 எடுக்கலாம் என்ற முயற்சியிலும் உள்ளோம். படம் கண்டிப்பாக வெற்றி பெறும் என நம்புகிறேன்' என பதில் அளித்தார்.