லோகேஷ் கனகராஜ் இயக்கத்தில் விஜய், விஜய் சேதுபதி, மாளவிகா மோகனன் உள்ளிட்டோர் நடித்துள்ள படம் மாஸ்டர். கரோனா காரணமாக வெளியீடு தாமதமான நிலையில், பொங்கலை முன்னிட்டு ஜனவரி 13ஆம் தேதி வெளியானது. கரோனா காரணமாக திரையரங்குகளில் 50% இருக்கைகளே அனுமதிக்கப்பட்டன. ஆனாலும் படம் தொடர்ந்து நல்ல வசூலை குவித்து வருகிறது. குறிப்பாக இந்தியா கடந்து உலக அளவில் வசூலில் சக்கைப்போடு போடுவதாக தயாரிப்பாளரே தெரிவித்துள்ளார்.
இந்நிலையில், 'மாஸ்டர்' படம் வெளியாகி 10 நாட்களில் ரூ.200 கோடி வசூல் குவித்துவிட்டதாக தயாரிப்பாளர் தெரிவித்துள்ளார். இது திரையுலகில் பெரும் ஆச்சரியத்தை ஏற்படுத்தியுள்ளது. ஏற்கனவே விஜய்யின் 'மெர்சல்', 'சர்கார்', 'பிகில்' படங்கள் 200 கோடி ரூபாய் வசூல் குவித்தது. தற்போது மாஸ்டரும் இப்பட்டியலில் இணைந்துள்ளது. இதனை விஜய் ரசிகர்கள் ட்விட்டரில் #MasterEnters200CrClub என்ற ஹேஷ்டேக்கை ட்ரெண்ட் செய்து வருகின்றனர்.
