சுபம் கிரியேஷன்ஸ் சார்பில் செந்தில்குமார் இயக்கத்தில் உருவாகியுள்ள படம் 'வீராபுரம் 220'. இப்படத்தில் அங்காடித்தெரு மகேஷ் நடித்துள்ளார். அவருக்கு ஜோடியாக மேக்னா நடித்துள்ளார். இந்த படத்திற்கு ரித்தேஷ்-ஸ்ரீதர் என்கிற இரட்டையர்கள் இசையமைத்துள்ளனர்.
படத்தின் இசை வெளியீட்டு விழா சென்னை சாலிகிராமத்தில் உள்ள பிரசாத் லேபில் நடைபெற்றது. இதில் இயக்குநர்கள் கே.பாக்யராஜ், ஆர்.வி.உதயகுமார், பேரரசு, நடிகர் ஆரி, தயாரிப்பாளர் சங்கத்தின் (கில்ட்) கௌரவ செயலாளர் ஜாக்குவார் தங்கம் மற்றும் பலர் கலந்து கொண்டனர்.
இதில் இயக்குநர் பாக்யராஜ் பேசுகையில், ”திரையரங்குகளின் ஆன்லைன் கட்டணங்கள் வசூலிப்பதன் மூலம் தனியார் நிறுவனங்கள் மிகப்பெரிய அளவில் லாபம் சம்பாதிக்கின்றனர்.
ஆனால் தயாரிப்பாளர்களுக்கு இதன் பலன் கிடைப்பதில்லை. அதனால்தான் அரசாங்கமே இந்த ஆன்லைன் டிக்கெட்டிங் முறையை தனது கையில் எடுத்திருக்கிறது.
இது யாரையும் மிரட்டுவதற்காக இல்லை. நம்மை தற்காத்துக் கொள்வதற்கான ஒரு தற்காப்பு முயற்சிதான். இதன்மூலம் 500, 1000 என அதிக விலைக்கு டிக்கெட்டுகளை விற்க முடியாது. பெரிய ஹீரோக்கள் தங்களது வியாபாரத்தை பார்த்து நியாயமான சம்பளத்தை பெற்றுக் கொள்ளும் சூழல் உருவாகும்.
அரசே ஆன்லைன் டிக்கெட்டை முறைப்படுத்தினாலும் டிக்கெட் விற்பனையில் நடைபெறும் முறைகேடுகளை தடுக்கமுடியாது” என்றார்.
