தமிழ் சினிமாவின் முன்னணி கதநாயகனாக திகழும் நடிகர் அஜித் திரைத் துறையில் தனக்கென்று ஒரு முத்திரையைப் பதித்துள்ளார். இவர் நடிப்பு தவிர்த்து கார் ரேஸிங், ஏரோமாடலிங், சமையல் என பல்வேறு துறைகளிலும் தடம்பதித்து அதில் சிறந்தவராகவும் விளங்குகிறார். அந்த வகையில் நடிகர் அஜித் கடந்த மாதம் கோவையில் நடைபெற்ற மாநில அளவிலான துப்பாக்கிச் சுடுதல் போட்டியில் 10 மீட்டர் ஏர் பிஸ்டல் பிரிவில் பங்கேற்று அடுத்தச் சுற்றுக்கும் தகுதிபெற்றார்.
அதைத் தொடர்ந்து சமீபத்தில் டெல்லியில் உள்ள டாக்டர் கர்னி சிங் துப்பாக்கிச் சுடும் பயிற்சி மையத்தில் துப்பாக்கிச் சுடும் பயிற்சியில் ஈடுபட்டார் அஜித். அப்போது அஜித் ரசிகர்கள் அவருடன் எடுத்துக்கொண்ட புகைப்படம் சமூக வலைதளங்களில் வைரலானது.
இந்நிலையில், இந்த தேசிய பயிற்சிப் போட்டியின் முடிவுகள் வெளியாகியுள்ளது. இந்தப் போட்டிகளில் மொத்தம் மூன்று பிரிவில் பங்கேற்ற அஜித் ப்ரீ பிஸ்டல் பிரிவில் எட்டாவது இடமும் ஸ்போர்ட்ஸ் பிஸ்டல் பிரிவில் ஒன்பதாவது இடமும் ஸ்டாண்டர்ட் பிஸ்டல் பிரிவில் 12ஆவது இடமும் பிடித்துள்ளார். இந்தப் புகைப்படங்களை அஜித் ரசிகர்கள் அதிகமாகப் பரப்பிவருகின்றனர்.
நடிகர் அஜித் இறுதியாக போனி கபூர் தயாரிப்பில் வினோத் இயக்கத்தில் நேர்கொண்ட பார்வை படத்தில் நடித்திருந்தார். பெண்களுக்கு எதிரான பாலியல் வன்முறையை எதிர்த்து குரல் கொடுக்கும் அமைதியான வழக்கறிஞர் வேடத்தில் நடித்திருந்த அஜித்தின் நடிப்பு பெரிதும் பாராட்டப்பட்டது. அவர் அடுத்ததாக மீண்டும் போனி கபூர் தயாரிக்கும் புதிய படத்தில் நடிக்கவுள்ளார். வினோத் இயக்கும் இப்படத்தின் படப்பிடிப்பு விரைவில் தொடங்குகிறது.
