இயக்குநர் சுரேந்தர் ரெட்டி இயக்கத்தில் சிரஞ்சீவி, அமிதாப் பச்சன், நயன்தாரா, விஜய் சேதுபதி, தமன்னா, கிச்சா சுதீப் உள்ளிட்ட பலர் நடிக்கும் திரைப்படம் 'சைரா நரசிம்மரெட்டி'. சுதந்திர போராட்ட வீரரான சைரா நரசிம்ம ரெட்டியின் வாழ்க்கை வரலாற்றை மையமாக வைத்து உருவாகும் இப்படத்தை நடிகர் ராம்சரண் தயாரிக்கிறார். வரலாற்று பின்னணியோடு உருவாகும் படம் என்பதால் பிரமாண்ட செட்கள் அமைக்கப்பட்டு படப்பிடிப்பு நடைபெற்று வந்தது.
சுமார் ரூ.250 கோடி செலவில் உருவான இந்தப் படத்தின் படப்பிடிப்பு முடிந்து வருகின்ற அக்டோபர் மாதம் வெளியாகும் என படக்குழு அறிவித்துள்ளது. சமீபத்தில், வெளியான இப்படத்தின் டீசர் ரசிகர்களிடையே நல்ல வரவேற்பைப் பெற்றது. தெலுங்கு, தமிழ், இந்தி ஆகிய மூன்று மொழிகளில் இப்படம் உருவாகியுள்ளது. இந்நிலையில், சைரா நரசிம்மரெட்டி படத்தின் மேக்கிங் வீடியோ இணையத்தில் வைரலாகி வருகிறது. மேக்கிங் வீடியோ என்றாலும் முழு படத்தை பார்த்த திருப்தியை இந்த மேக்கிங் வீடியோ தந்துள்ளதாக ரசிகர்கள் சிலாகிக்கின்றனர்.
இந்த மேக்கிங் வீடியோ ஒவ்வொருவரின் கதாப்பாத்திரத்தை தெளிவுப்படுத்துகிறது. தேவதையாக வரும் நயன்தாரா, அமிதாப் பச்சனின் அதிரடியான என்ட்ரி, கிச்சா சுதீப்பின் வில்லத்தனம், ஜெகபதி பாபு, தமன்னாவின் போர் குணம் என ஒவ்வொருவரையும் விவரிக்கும் காட்சிகள் பார்ப்பவர்களை பிரமிக்க வைக்கிறது. பழங்காலத்தில் பயன்படுத்தப்பட்ட போர் கத்தி, வாள், ஆடைகள் முதற்கொண்டு ரசனையோடு படக்குழுவினர் தயார் செய்துள்ளனர். ராம் லட்சுமணின் ஸ்டண்ட் காட்சிகளும், வெளிநாட்டுக் கலைஞர்களும் இதில் பணியாற்றியுள்ளனர்.
நல்ல கதைகளத்துடன் பாகுபலிக்கு இணையாக உருவாகியுள்ள இப்படத்தின் மேக்கிங் வீடியோ ரசிகர்களிடையே படத்திற்கான எதிர்பார்ப்பை ஏற்படுத்தியுள்ளது.
