சென்னை: சிம்புதேவன் இயக்கத்தில் வெளியான 'கசட தபற' திரைப்படத்தின் வெற்றியை படக்குழுவினர் கேக் வெட்டி கொண்டாடினர்.
சிம்புதேவன் இயக்கத்தில் வெங்கட் பிரபுவின் பிளாக் டிக்கெட் கம்பெனி நிறுவனம் மற்றும் ஆர். ரவீந்திரனின் ட்ரைடெண்ட் ஆர்ட்ஸ் இணைந்து தயாரித்துள்ள படம் 'கசட தபற'. இதில் வெங்கட் பிரபு, பிரேம்ஜி, சந்தீப் கிஷன், ஹரிஷ் கல்யாண், சாந்தனு பாக்யராஜ், பிரியா பவானி சங்கர், சாந்தினி தமிழரசன், வித்யா பிரதீப், ரெஜினா, விஜயலட்சுமி உள்ளிட்டோர் நடித்துள்ளனர்.
ஆறு கதைகள். எல்லாக் கதைகளும் ஒன்றுக்குக்கொன்று தொடர்புபடுத்தப்பட்ட திரைக்கதை அம்சத்துடன் உருவாகியிருந்தது இந்தப் படம்.
ஒவ்வொரு கதைக்கும் தனித்தனி நடிகர்கள், ஒளிப்பதிவாளர்கள், படக்தொகுப்பாளர், இசையமைப்பாளர் என புதுமையாக அமைந்திருந்த 'கசட தபற' திரைப்படம் சோனி லிவ் ஓடிடி தளத்தில் வெளியானது.
படத்தில் இடம்பெற்ற அனைத்து கதைகளும் ரசிகர்களை பெரிதும் கவர்ந்த நிலையில், படத்தில் நடித்திருந்த அனைவரது நடிப்பும் வெகுவாகப் பாராட்டப்பட்டது.
இதைத்தொடர்ந்து படக்குழுவினர் அனைவரும் கேக் வெட்டி இந்த வெற்றியை கொண்டாடியுள்ளனர். இந்த வெற்றிக் கொண்டாட்டம் தொடர்பான புகைப்படங்கள் தற்போது சமூக வலைத்தளங்களில் அதிகமாக பகிரப்பட்டு வருகிறது.
ஓடிடி தளங்களில் வருகையால் ஒன்றுக்கும் மேற்பட்ட கதைகளோடு கூடிய படங்கள் வெளியாகும் போக்கும் அதிகரித்துள்ளது. அந்த பட்டியலில் இடம்பிடித்துள்ள 'கசட தபற' வெற்றிப் படமாக மாறியுள்ளது.
இதையும் படிங்க: பூஜா ஹெக்டேவை ரசித்துப் பார்க்கும் பிரபாஸ்!
