நடிகை, பாடகி என பன்முகம் கொண்ட ஸ்ருதி ஹாசன், தமிழ், தெலுங்கு, இந்தி ஆகிய மொழிப் படங்களில் நடித்து வருகிறார். இந்தியாவில் கரோனா அச்சுறுத்தல் தொடங்கிய நாள் முதலே மும்பையில் ஸ்ருதிஹாசன் இருக்கிறார். ஊரடங்கால் வீட்டில் இருக்கும் ஸ்ருதி, சமையல் செய்வது, வீட்டைச் சுத்தம் செய்வது, உடற்பயிற்சி செய்வது என வழக்கத்தை விட, அதிக வேலைகள் பார்ப்பதாக சமீபத்தில் தனது சமூக வலைதளத்தில் கூறினார்.
அதுமட்டுமல்லாது புதிய பாடல்களுக்கு மெட்டு அமைப்பதாகவும்; பல ஆண்டுகளுக்குப் பிறகு, அதிக நேரம் தூங்குவதாகவும் தெரிவித்திருந்தார். ஸ்ருதி ஹாசன் சமூக ஊடகத்தில் தனது ரசிகர்களுடன் நிறைய நேரத்தை செலவிட்டுவருகிறார். அதுமட்டுமல்லாது சமீபத்தில் யூ-டியூப் சேனல் தொடங்கி ஆரோக்கியம், உடற்பயிற்சி, சமையல் கலை, ஒப்பனை குறிப்புகள், யாரும் இதுவரை பார்த்திராத வீடியோக்கள் என ரசிகர்களுக்காகப் பதிவிட்டு வருகிறார்.
தற்போது தனது சமூக வலைதளப் பக்கத்தில், ஊரடங்கு காலத்தில் தனது நாள் எவ்வாறு செல்கிறது என்பது பற்றி தனது இன்ஸ்டாகிராமில் வீடியோ ஒன்றை வெளியிட்டுள்ளார். அதில், காலையில் படுக்கையில் இருந்து எழுந்திருப்பது, போட்டோ ஸூட், என இடம் பெற்றுள்ளன. வித்யுத் ஜம்வால் நடிப்பில் உருவாகியுள்ள 'யாரா' திரைப்படத்தில் ஸ்ருதிஹாசன் நடித்துள்ளார் என்பது குறிப்பிடத்தக்கது.
