டெல்லி: ஹாலிவுட் அனிமேஷன் திரைப்படத்தின் தமிழ்ப் பதிப்புக்கு நடிகை ஸ்ருதி ஹாசன் டப்பிங் பேசவுள்ளார்.
தமிழில் விஜய் சேதுபதி ஜோடியாக 'லாபம்' படத்தில் நடித்து வருகிறார், நடிகை ஸ்ருதிஹாசன். இந்தியிலும் ஒரு படத்தில் நடித்து வரும் இவர், தற்போது ஹாலிவுட் சூப்பர் ஹிட் அனிமேஷன் திரைப்படமான 'ஃப்ரோசன் 2' படத்தின் தமிழ்ப் பதிப்புக்கு டப்பிங் பேசவுள்ளார்.
இந்தப் படத்தின் பிரதான கதாபாத்திரமாக எல்சா - ஆனா என சகோதரிகளின் கதாபாத்திரங்கள் இருக்கின்றன. இதையடுத்து எல்சா கதாபாத்திரத்துக்கு நடிகை ஸ்ருதி ஹாசன் டப்பிங் பேசவுள்ளார். அத்துடன் படத்துக்காக மூன்று பாடல்களும் பாடவுள்ளார்.
இதுகுறித்து ஸ்ருதிஹாசன் கூறியதாவது, 'எனக்கு மிகவும் பிடித்த படங்களில் ஒன்று ஃப்ரோசன். அனிமேஷன் படமாக இருந்தாலும் இதில் சகோதரிகளாகத் தோன்றும் எல்சா - ஆனா கதாபாத்திரம் மனதை உருகச் செய்யும். ஒரு அக்காவாக எல்சா கேரக்டர், தங்கை ஆனா மீது காட்டும் பாசத்தைப்போன்று நான் என் தங்கையிடமும் வெளிப்படுத்துவேன்.
ஒவ்வொரு பெண்ணுக்கும் முன்மாதிரியாக எல்சா கதாபாத்திரம் இருக்கிறது. அந்த வகையில் எல்சா கேரக்டருக்கு குரல் கொடுக்க உற்சாகமாகவுள்ளேன். அதோடு ரசிகர்களை ஈர்க்கும் விதமான திரைக்கதை, பாடல்களுடன் சிறப்பான விருந்தாக அமையவுள்ள படத்தை தமிழ் ரசிகர்கள் காண ஆர்வமாக உள்ளேன்' என்றார்.
ஏற்கனவே இந்தப் படத்தின் இந்திப் பதிப்பில் பாலிவுட் சினிமா சகோதரிகளான பிரியங்கா சோப்ரா - ப்ரிணீதி சோப்ரா ஆகியோர் குரல் கொடுக்கவுள்ளனர். இதையடுத்து தற்போது தமிழில் ஒரு கதாபாத்திரத்துக்கு நடிகை ஸ்ருதி ஹாசன் குரல் கொடுக்கவிருக்கிறார்.
டிஸ்னி நிறுவனம் தயாரித்துள்ள ஃப்ரோசன் படத்தின் இரண்டாம் பாகமாக உருவாகியிருக்கும் 'ஃப்ரோசன் 2' இந்தியாவில் ஆங்கிலம், தமிழ், இந்தி, தெலுங்கு ஆகிய நான்கு மொழிகளில் நவம்பர் 22ஆம் தேதி வெளியாகிறது.
இதையும் படிங்க:
