தமிழ் சினிமாவில் வசதியான ஆடம்பர வாழ்க்கை என்பது ஸ்டார் நடிகர், நடிகைகளுக்கு மட்டும்தான். நகைச்சுவை, குணச்சித்திர நடிகர்களாக நடித்தவர்களில் ஒரு சிலர் மட்டுமே சொகுசு வாழ்க்கை வாழ்கின்றனர். ஆனால், உண்மையில் பல குணச்சித்திர நடிகர்களின் இறுதி வாழ்க்கை மிக சோகமாகவே இருக்கிறது.
அந்த வகையில், பிரபல நாட்டுப்புற பாடகியும், நடிகையுமான பரவை முனியம்மாவின் கதையைக் கேட்டால் கண்ணீருடன் சோகம் தொற்றிக் கொள்ளும். கடந்த 2003ஆம் ஆண்டு விக்ரம் நடிப்பில் வெளிவந்த "தூள்' படத்தில் 'மதுரை வீரன் தானே' என்ற பாடலை பாடி ரசிகர்களின் மனதில் இடம்பிடித்தவர் பரவை முனியம்மா. இந்த பாடல் பட்டி தொட்டியெங்கும் பிரபலமானது. தொடர்ச்சியாக காதல் சடுகுடு, தேவதையைக் கண்டேன் என 25 படங்களுக்கு மேல் நடித்துள்ளார்.
கடந்த 2014ஆம் ஆண்டு இவர் கடைசியாக சிவகார்த்திகேயன் நடித்த மான் கராத்தே படத்தில் ராயபுரம் பீட்டரு பாடலைப் பாடி அசத்தினார். இவரது உடல்நிலை ஒத்துழைக்காத காரணத்தால் அந்த படத்திற்குப் பிறகு வேறு எந்தப் படத்திலும் நடிக்கவில்லை. கலைஞர் தொலைக்காட்சியில் கிராமத்து சமையல் நிகழ்ச்சியில் இவர் பாட்டு பாடிக்கொண்டே கிராமத்து சமையலை சமைத்து பார்வையாளர்களின் இதயத்தை தொட்டவர் இன்று யாரும் பார்க்க முடியாத நிலையில் இருப்பது மன வேதனையைத் தருகிறது.
சினிமா சிலரது வாழ்க்கையில் வெளிச்சத்தைக் கொடுத்தாலும் பரவை முனியம்மா போன்ற பலருக்கு ஒரு இருண்ட காலத்தையே வழங்குகிறது. அதுபோல் இவரும் தனது தள்ளாத வயதில் தனி ஆளாக யாருடைய உதவியும் இல்லாமல் கடினமான வாழ்க்கையை வாழ்ந்து வந்துள்ளார். உடல்நிலை சீர்குலைந்து மொட்டையடித்து இருப்பது போன்று வெளியான புகைப்படம் ரசிகர்களை கண்கலங்க வைத்துள்ளது.
சில நாட்களாகவே உடல்நலக்குறைவால் பாதிக்கப்பட்டிருந்த பரவை முனியம்மாவிற்கு சிகிச்சை பெற போதிய பணவசதி இல்லாததால், மருத்துவமனையில் இருந்து வீட்டிற்கு திரும்பினார். இதனை கேள்விப்பட்ட பட்டதாரி நடிகர் அபி சரவணன் முனியம்மாவின் வீட்டிற்கு வந்து நலம் விசாரித்து உதவிக்கு பணமும், பழங்கள் துணிகள் வாங்கிக் கொடுத்தார். மேலும் அவர் மூச்சு விடுவதற்கு சிரமப்படுவதை அறிந்த அபி சரவணன் அவரை உடனடியாக மதுரை வேலம்மாள் மருத்துவமனை அவசர சிகிச்சைப் பிரிவில் அனுமதித்துள்ளார். அங்கு அவருக்கு மருத்துவ பரிசோதனைகள் செய்யப்பட்டு சிகிச்சை அளிக்கப்பட்டு வருகிறது.
இதுகுறித்த தகவல் அறிந்த, கார்த்தி, நாசர், பொன்வண்ணன், ஐசரி கணேஷ், பாக்யராஜ் ஆகியோர் பரவை முனியம்மாளின் உடல்நலம் குறித்து அபி சரவணனிடம் விசாரித்துள்ளதாகக் கூறப்படுகிறது.
