தமிழ் திரைப்படங்களில் நடித்து புகழ்பெற்றவர் நடிகை ரம்பா. இவர் ஆந்திர மாநிலம் விஜயவாடாவில், ஜூன் 5, 1974இல் பிறந்தார். இவருடைய இயற்பெயர் விஜயலட்சுமி. பின்னர் திரைப்படத்திற்காகத் தனது பெயரை முதலில் அம்ரிதா எனவும், பின்பு ரம்பா எனவும் மாற்றிக்கொண்டார். 1993இல் ஈ.வி.வி.சத்யநாராயணா இயக்கத்தில் வெளியான ”ஆ ஒக்கடு அடக்கு” என்ற தெலுங்குப் படமே, ரம்பா நடித்த முதல் படமாகும்.
தமிழில் அவர் நடித்த முதல் திரைப்படம் கதிர் இயக்கத்தில் 1993ஆம் ஆண்டு வெளியான 'உழவன்' ஆகும். அவருடைய இரண்டாவது படமான ”உள்ளத்தை அள்ளித்தா” பெரும் வெற்றிபெற்று புகழ் சேர்த்தது. அவருடைய ரசிகர்கள் அவரை ”தொடை அழகி” என அழைத்துக் கொண்டாடினர். கதாநாயகியாக மட்டுமல்லாமல், ரம்பா தயாரிப்பாளராகவும் இருந்திருக்கிறார். அவருடைய சகோதரர் வாசுவுடன் இணைந்து ”த்ரீ ரோசஸ்” எனும் தமிழ்த் திரைப்படத்தைத் தயாரித்தார். அதில் ரம்பாவுடன் இணைந்து ஜோதிகா, லைலா ஆகியோர் நடித்தனர்.
ரம்பா நடித்த ”குயிக் கன் முருகன்” என்ற திரைப்படம் ஆங்கிலம், இந்தி, தமிழ், தெலுங்கு எனப் பல மொழிகளில் வெளியாகி வெற்றிபெற்றது. அதில் அவர் நடித்த மேங்கோ டாலி என்ற கதாபாத்திரத்தின் மூலம் புகழ் பெற்றார். அவர் தெலுங்கு, தமிழ், மலையாளம், இந்தி, கன்னடம், பெங்காலி, போஜ்புரி ஆகிய மொழிகளில் வெளியான பல திரைப்படங்களின் வெற்றிக்கு ரம்பாவின் நடிப்பே மூலக்காரணம். கலைஞர் தொலைக்காட்சியின் ”மானாட மயிலாட” நிகழ்ச்சியில் நடுவராகவும் கலந்துகொண்டு கலக்கினார். இத்தனை புகழையும் தனதாக்கிக் கொண்ட ரம்பா, இன்று தனது 47ஆவது பிறந்த நாளைக் கொண்டாடுகிறார். அவரது ரசிகர்கள் சமூக வலைதளங்களில் அவருடைய புகைப்படங்களையும், காணொலிகளையும் வெளியிட்டு வாழ்த்து தெரிவித்துவருகின்றனர்.
இதையும் படிங்க : நம்மூரு முத்தழகு முதல் தெலுங்கு பச்சையம்மா வரை - நினைத்தாலே இனிக்கும் பிரியாமணி
