தஞ்சைப் பெரிய கோயிலின் குடமுழுக்கு விழாவுக்காக சென்னையில் இருந்து சென்ற தமிழ்ப் பேரரசு கட்சியின் பொதுச் செயலாளரும் திரைப்பட இயக்குநருமான வ.கவுதமனை கள்ளக்குறிச்சி மாவட்டம் உளுந்தூர்பேட்டை சுங்கச்சாவடி அருகில் காவல்துறையினர் தடுத்து நிறுத்தினர். பின்னர், அவரிடம் விசாரணை மேற்கொள்ள வேண்டுமென மேலிடத்தில் இருந்து உத்தரவிட்டுள்ளதாகக் கூறி, அவரை அழைத்து மாவட்ட காவல் கண்காணிப்பாளர் அலுவலகத்திற்கு கொண்டு செல்ல முற்பட்டனர்.
இங்கேயே விசாரணையை மேற்கொள்ளலாமே என்று இயக்குநர் கவுதமன் கூற, அதனைத் தொடர்ந்து உளுந்தூர்பேட்டை சுங்கச்சாவடி அலுவலகத்தில் வைத்து விசாரணை மேற்கொண்டனர். விசாரணையைத் தொடர்ந்து காவல்துறையினர் அவரை கைது செய்வதாக அறிவித்தனர்.
அப்போது ஊடகங்களை சந்தித்த இயக்குநர் கவுதமன், ' உயர்நீதிமன்ற மதுரைக் கிளையின் உத்தரவை மீறி, தஞ்சையில் நடைபெறும் குடமுழுக்கு விழாவில் தமிழ் மரபுகளை மறைத்து குடமுழுக்கை நடத்தும் இந்து அறநிலைத் துறையை கண்டித்தும் தமிழில் குடமுழுக்கு செய்ய வலியுறுத்தியும், மக்கள் மத்தியில் அதற்கு ஆதரவு திரட்ட நான் கிளம்பியிருப்பதாக உளவுத் துறை தகவல் கிடைத்திருக்கிறதாம். அதனால், நான் தஞ்சை பெரிய கோயில் நோக்கி சென்றுகொண்டிருந்தபோது காவல்துறையினர் முன்னெச்சரிக்கை நடவடிக்கையாக என்னை கைது செய்வதாக கூறுகிறார்கள்.
எது எப்படியோ தமிழில் குடமுழுக்கு நடந்தே தீர வேண்டும். அப்படி மீறும் பட்சத்தில் நாங்கள் ஒருபோதும் தமிழை விட்டுக் கொடுக்க மாட்டோம். தமிழ்நாட்டில் எச்.ராஜா போன்றவர்கள் தமிழுக்கும் தமிழர்களுக்கும் எதிராகப் பேசுவதை தமிழராகிய நாங்கள் ஒரு காலமும் இனி பொறுத்துக்கொள்ள மாட்டோம். அவரைப் போன்ற தமிழர் விரோதிகளின் பேச்சு ஒரு காலமும் இங்கே எடுபடாது ' என்றார்.
ஊடகங்களிடையே அவர் பேசிக்கொண்டிருக்கும் போதே, அவரை காவல்துறையினர் கைது செய்து தரதரவென இழுத்து சென்றனர். இயக்குநர் கவுதமன் மற்றும் அவருடன் பயணப்பட்டிருந்த இருவரையும் கள்ளக்குறிச்சி மாவட்ட காவல் கண்காணிப்பாளர் உத்தரவின் பேரில் கைது செய்துள்ளதாக அதிகாரி ஒருவர் தகவல் தெரிவித்தார்.
திரைப்பட இயக்குநர் கவுதமன் கைது செய்யப்பட்ட சம்பவம் அந்தப் பகுதியில் பெரும் பரபரப்பை ஏற்படுத்தி உள்ளது.
இதையும் படிங்க : ஸ்டெர்லைட் துப்பாக்கிச் சூடு : ரஜினிகாந்தை நேரில் ஆஜராக ஆணையம் சம்மன்!
