நடிகர் அயுஷ்மன் குர்ரானா, நடிகைகள் தபு, ராதிகா ஆப்தே உட்பட பலர் நடித்து இந்தியில் ஹிட்டான படம், ‘அந்தாதுன்’. பிளாக் காமெடி கிரைம் த்ரில்லராக உருவான இந்தப் படத்தை ஸ்ரீராம் ராகவன் இயக்கியிருந்தார். கடந்தாண்டு மத்திய அரசால் அறிவிக்கப்பட்ட தேசிய திரைப்பட விருதில் சிறந்த படம், சிறந்த நடிகர், சிறந்த திரைக்கதை ஆகிய முன்று பிரிவுகளில் விருது வாங்கியது.
அதேபோல், மெல்போர்ன் திரைப்பட விழாவிலும் சிறந்த திரைப்படம், சிறந்த நடிகர், சிறந்த படம் ஆகியப் பிரிவுகளிலும் விருது வாங்கியது. இதனையடுத்து இப்படத்தை தமிழில் ரீமேக் செய்வதற்கான உரிமையை நடிகர் தியாகராஜன் வாங்கியுள்ளார். அந்தாதுன் கதை ஒரு பியானோ மாஸ்டரை மையமாகக் கொண்டது.
பிரசாந்த் லண்டன் டிரினிடி இசைக் கல்லூரி மாணவர் என்பதாலும், நல்ல கைத்தேர்ந்த பியானோ கலைஞர் என்பதாலும் இந்த கதாபாத்திரம் அவருக்குப் பொருத்தமாக இருக்கும் என தியாகராஜன் கூறியிருந்தார்.
வெங்கடேஷ் இயக்கும் இந்த படத்தில் ராதிகா ஆப்தே கதாபாத்திரத்தில் மிஸ் தமிழ்நாடு பட்டம் வென்ற அனுகீர்த்தி வாஸ் நடிக்க உள்ளதாக தகவல்கள் தெரிவிக்கின்றன. இதுகுறித்த அதிகாரப்பூர்வ தகவல்கள் விரைவில் வெளியாகும் என எதிர்பார்க்கப்படுகிறது.
