இயக்குநர் கவுதம் வாசுதேவ் மேனன் இயக்கத்தில் தனுஷ் நடிக்கும் படம் ‘எனை நோக்கி பாயும் தோட்டா’. முதல் முறையாக இருவரும் இணைந்துள்ளதால், இப்படத்தின் மீதான எதிர்பார்ப்பு அதிகமாக உள்ளது. இப்படத்தில் இருந்து ஒரு பாடலை முதலில் வெளியிட்டார் கவுதம் வாசுதேவ் மேனன். 'மறு வார்த்தை பேசாதே' என தொடங்கும் பாடல், இளைஞர்களை கட்டிப் போட்டது. பாடல் வரியும், குரலும், இசைக் கோர்ப்பும்.. யாருடா.. இந்த இசையமைப்பாளர்.. என்று கேட்க வைத்தது.
இசையமைப்பாளர் யார் என்பதை சொல்லாமல் வெகுநாட்களாக சஸ்பென்ஸ் வைத்தார் கவுதம் வாசுதேவ் மேனன். ஒரு கட்டத்தில் இசையமைப்பாளர் தர்புகா சிவா என்று அறிவித்தார். இயக்குநர் கவுதம் வாசுதேவ் மேனன் வெளியிட்ட 'ராஜதந்திரம்' படத்தில் காமெடி கதாபாத்திரத்தில் நடித்திருந்தார் தர்புகா சிவா. அவரை எனை நோக்கி பாயும் தோட்டா படத்தின் மூலம் இசையமைப்பாளராக அறிமுகப்படுத்தினார் கவுதம். இந்தப்படம் பல்வேறு சிக்கல்களில் சிக்கி வெளிவராமல் உள்ளது.
அடுத்து சசிக்குமார் நடிப்பில் வெளியான ‘கிடாரி’, ‘பலே வெள்ளைய தேவா’ ஆகிய திரைப்படங்களுக்கு தர்புகா சிவா இசையமைத்துள்ளார். இந்த படங்களின் பாடல்கள் பெரிய வரவேற்பைப் பெற்றன. நடிகர், இசையமைப்பாளராக இருக்கும் தர்புகா சிவா, தற்போது இயக்குநராக அவதாரம் எடுத்துள்ளார். இந்தப் படத்தை சூப்பர் டாக்கீஸ் சார்பில் சமீர் பரத் ராம் மற்றும் தீபா ஐயர் ஆகியோர் இணைந்து தயாரிக்கின்றனர். இப்படத்தின் படப்பிடிப்பு தற்போது வேகமாக நடைபெற்று வருகிறது. மேலும், இந்தப் படத்தின் டைட்டில் மற்றும் கூடுதல் தகவல் விரைவில் வெளியாகும் என்று எதிர்பார்க்கப்படுகிறது.
