தனி நீதிபதியின் உத்தரவை எதிர்த்து நடிகர் விஷால் மேல்முறையீட்டு மனுவை உயர் நீதிமன்றத்தில் தாக்கல் செய்திருந்தார். இம்மனு நீதிபதிகள் சத்தியநாராயணன், அப்துல் குத்தூஸ் ஆகியோர் அடங்கிய அமர்வு முன் இன்று (10.03.2020) விசாரணைக்கு வந்தது.
அப்போது, விஷால் தரப்பில் ஆஜரான வழக்கறிஞர், நடிகர் சங்கத்திற்குத் தேர்தலை நடத்தி முடிக்க 35 லட்ச ரூபாய் செலவு செய்யப்பட்டதாகவும், அதில் 80% வாக்குகள் பதிவாகியிருந்த நிலையில் பல மாதங்களாக வாக்குகள் எண்ணாமல் இருப்பதாகவும் தெரிவித்தார். இதையெல்லாம் தனி நீதிபதி கருத்தில் கொள்ளாமல், தேர்தலை ரத்து செய்துவிட்டதாக அவர் வாதிட்டார்.
இதைப் பதிவு செய்துகொண்ட நீதிபதிகள், மறு தேர்தல் நடத்துவது தொடர்பாக தனி நீதிபதி பிறப்பித்த உத்தரவுகளுக்கு இடைக்கால தடை விதித்து உத்தரவிட்டனர். நடிகர் சங்கத்தை நிர்வகிப்பது தொடர்பாக பிறப்பிக்கப்பட்ட தனி நீதிபதியின் உத்தரவுப்படி, தனி அலுவலர் தொடர்ந்து செயல்படலாம் என உத்தரவிட்டனர். விசாரணையை ஏப்ரல் 8ஆம் தேதிக்கு ஒத்திவைத்து, தமிழ்நாடு அரசு பதிலளிக்க உத்தரவிட்டனர்.
தென்னிந்திய நடிகர் சங்கத்திற்கு கடந்த ஆண்டு ஜூன் 23ஆம் தேதி தேர்தல் நடைபெற்றது. அத்தேர்தலில், சங்க உறுப்பினர்கள் பலரை நீக்கியது தொடர்பாகவும், தபால் வாக்கு எண்ணிக்கையில் ஏற்பட்ட குளறுபடி தொடர்பாகவும் வழக்கு தொடரப்பட்டது.
இந்த வழக்கை விசாரித்த தனி நீதிபதி கல்யாணசுந்தரம், தென்னிந்திய நடிகர் சங்கத் தேர்தலை ரத்துசெய்தும் மறுதேர்தல் நடத்தவும் உத்தரவிட்டிருந்தார். நடிகர் சங்க நிர்வாகிகள் பதவிக்காலம் முடிந்த பின்பு எடுத்த எந்த முடிவுகளும் செல்லாது எனவும் அவர் கூறியிருந்தார்.
நடிகர் சங்கத்திற்கு மறுதேர்தலை நடத்த ஓய்வுபெற்ற நீதிபதி கோகுல்தாஸை நியமித்து, மூன்று மாதத்திற்குள் தேர்தல் நடத்தி முடிக்கப்பட வேண்டும் என்றும், வாக்காளர் பட்டியல் சரிபார்க்கப்பட வேண்டும் என்றும், அதுவரை நடிகர் சங்க நிர்வாகத்தை தனி அலுவலர் கவனிப்பார் என்றும் தனி நீதிபதி உத்தரவிட்டிருந்தார்.
இதையும் படிங்க: நடிகர் சங்க தேர்தல் ரத்து விவகாரம் - விஷால் மேல் முறையீடு
