பிக்பாஸ் நிகழ்ச்சியின் மூலம் பிரபலமான ஹரீஷ் கல்யாண் 'இஸ்பேட் ராஜாவும் இதயராணியும்' படத்திற்கு பிறகு 'தனுசு ராசி நேயர்களே' படத்தில் நடித்து வருகிறார். இயக்குநர் சந்தான பாரதியின் மகன் சஞ்சய் பாரதி இயக்கும் இப்படத்தில் நடிகைகள் ரியா சக்ரபோர்த்தி, ரெபோ மோனிகா ஜான் ஆகியோர் நடித்து வந்தனர்.
படத்தின் பூஜைகள் தொடங்கி படப்பிடிப்பு பணிகள் விறுவிறுப்பாக நடைபெற்றுவந்த நிலையில் கால்ஷிட் பிரச்னையால் நடிகை ரியா சக்ரபோர்த்தி இப்படத்தில் இருந்து விலகியுள்ளார். இந்நிலையில், அவருக்கு பதிலாக ஏக் வீர் கி அர்தாஸ்..... வீரா' சீரியல், ஜெலபி, ஹிப்பி ஆகிய படங்களில் நடித்த டிகங்கனா சூர்யவான்ஷி இப்படத்தில் நடிக்க ஒப்பந்தமாகியுள்ளார். 'தனுசு ராசி நேயர்களே' படத்தின் மூலம் தமிழில் அறிமுகமாகும் டிகங்கனா தனது நடிப்புத் திறமையால் தாதாசாகேப் பால்கே விருது பெற்றவராவார்.
இதுகுறித்து டிகங்கனா கூறுகையில், தமிழ் படத்தில் நடிக்க வாய்ப்பு கிடைக்கும்னு நினைத்து கூட பார்க்கவில்லை. ரொம்ப மகிழ்ச்சியா இருக்கு. படப்பிடிப்பின் முதல் நாள் என்ற பதற்றம் இருந்தாலும், புரியாத மொழி புது மனிதர்கள் என புதிய அனுபவத்தை தருகிறது. இது என் வாழ்க்கையில் மறக்க முடியாத நாள். தெலுங்குல ஹிப்பி படத்தில் நடித்திருக்கேன். இருந்தாலும், இந்தப் படத்தில் என் கதாப்பாத்திரம் பேசும்படி இருக்கும். நல்ல கதைகளை தேர்ந்தெடுத்து நடிக்க ஆசை. இது எனக்கு சரியாக அமைந்துள்ளது என்றுதான் நினைக்கிறேன் எனக் கூறினார்.
