மக்களிடைய இணைய சேவை அதிகரிக்கத் தொடங்கியதும் உலக செய்திகள் முதல் உள்ளூர் செய்திகள் வரை அனைத்தும் அவர்களது கைகளுக்கு எளிதில் சென்று சேர்ந்தது.
ஆனால், மறுபுறம் போலிச் செய்திகளும் தவறான தகவல்களும் மக்களிடம் செல்வது அதிகரித்து வருகிறது. இதைத் தடுக்க டெக் நிறுவனங்கள் பல்வேறு நடவடிக்கைகளை மேற்கொண்டு வருகின்றன. அந்த வகையில் கூகுள் நிறுவனம், தரமான, சிறப்பான முறையில் உருவாக்கப்படும் செய்திகளை மக்களிடையே எடுத்துச் செல்ல புதிய சேவை ஒன்று தொடங்குவதாக கடந்த ஜூன் மாதம் அறிவித்தது.
அதன்படி சர்வதேச அளவில் முன்னணியில் உள்ள செய்தி நிறுவனங்களுடன் கூகுள் நிறுவனம் தற்போது ஒப்பந்தம் மேற்கொண்டுள்ளது. இதன் மூலம் செய்திகளை சிறப்பான முறைகளில் மக்களிடம் எவ்வாறு எடுத்துச் செல்லலாம் என்பது குறித்து கூகுள் ஆராய்ந்து வருகிறது. மேலும், சிறப்பான முறையில் செய்தி வெளியிடும் நிறுவனங்களுக்கு சிறப்பு உரிமம் வழக்குவது குறித்தும் கூகுள் பரிசீலித்து வருகிறது.
அமெரிக்காவில் தொடங்கப்பட்ட இந்தத் திட்டத்தை பிரேசில், ஜெர்மனி உள்ளிட்ட 10க்கும் மேற்பட்ட நாடுகளில் விரிவுபடுத்தும் நடவடிக்கைகளிலும் கூகுள் தற்போது இறங்கியுள்ளது. அதன்படி அந்த நாடுகளில் உள்ள முக்கிய செய்தி நிறுவனங்களுடன் கூகுள் நிறுவனம் கைக்கோர்த்துள்ளது.
மேலும், மாதம்தோறும் சுமார் 24 பில்லியன் வாசகர்களை செய்தித் தளங்களுக்கு கொண்டு செல்வதாகவும் கூகுள் தெரிவித்துள்ளது. இதன் மூலம் செய்தி நிறுவனங்கள் விளம்பரங்கள் வாயிலாக கணிசமான வருவாயைப் பெறுவதாகவும் அதில் தெரிவிக்கப்பட்டுள்ளது.
இதையும் படிங்க: 'சின்ன ரூட், அதிக லாபம்' - இந்திய ரயில்வேயின் புதுத் திட்டம்
