பிரபல சீன ஸ்மார்ட்போன் நிறுவனமான விவோவின் இணை நிறுவனமான ஐகூ கடந்த பிப்ரவரி மாதம் ஐகூ 3 என்ற ஸ்மார்ட்போனை வெளியிட்டது. ஸ்னாப்டிராகன் 865 பிராசஸர், 4440mah பேட்டரி என அட்டகாசமான வசதிகளுடன் வெளியான ஐகூ 3 ஸ்மார்ட்போனுக்கு பெரும் வரவேற்பு கிடைத்தது.
இதனால் ஐகூ நிறுவனத்தின் அடுத்த ஸ்மார்ட்போன் மாடலுக்கு ரசிகர்களிடையே பெரும் எதிர்பார்ப்பு ஏற்பட்டது. இந்நிலையில், ஐகூ நிறுவனம் தனது புதிய ஸ்மார்ட்போன் மாடலான iQOO Neo 3 5G-இன் வெளியீட்டுத் தேதியை தற்போது அறிவித்துள்ளது. சீனாவில் வரும் ஏப்ரல் 23ஆம் தேதி வெளியாகவிருக்கும் இந்த ஸ்மார்ட்போனின் சில அம்சங்கள் குறித்த தகவல்களும் வெளியாகியுள்ளன.
அதன்படி iQOO Neo 3 5G ஸ்மார்ட்போன் 6.6 இன்ச் எல்இடி டிஸ்பிளேவையும் ஸ்டீரியோ ஸ்பீக்கரையும் கொண்டிருக்கும். மேலும், முதன்மை கேமராவாக 48 மெகாபிக்சல் கேமராவும் அத்துடன் ஒரு அல்ட்ரா வைடு கேமராவும் இதில் இருக்கும் என்று எதிர்பார்க்கப்படுகிறது.
ஸ்னாப்டிராகன் 865 பிராசஸர் பயன்படுத்தப்பட்டுள்ளதால் இந்த ஸ்மார்ட்போனில் 5ஜி வசதி உள்ளது. இந்த ஸ்மார்ட்போன் 12 ஜிபி ரேம், 256 ஜிபி ஸ்டோரேஜை கொண்டிருக்கும். இதன் விலை ரூ.35,000-க்குள் இருக்கும் என்று எதிர்பார்க்கப்படுகிறது.
இதையும் படிங்க: 108 மெகாபிக்சல் கேமராவுடன் வெளியாகும் நோக்கியா!
