கல்வியாளர், சமூக மதச் சீர்திருத்தவாதி, அரசியல் சிந்தனையாளர், மருத்துவர், படைப்பாளர், பத்திரிகை ஆசிரியர் என பன்முக முகங்களை கொண்டவர் பண்டிதர் அயோத்தி தாசர். ஒடுக்கப்பட்ட மக்களின் உரிமைக்குரலாய் வெடித்தெழுந்தவரின் 105வது நினைவு தினம் இன்று. சுரண்டப்படும் பாட்டாளி வர்க்கத்தின் விடுதலைக்கு தன் வாழ்நாளையே ஒப்படைத்துக் கொண்ட மாமேதை கார்ல் மார்க்ஸ் பிறந்த தினத்தில்தான் மேதை அயோத்தி தாசரும் இறந்திருக்கிறார்.
இந்தியாவில் மட்டும்தான் ஒடுக்கப்பட்ட மக்களுக்கு கிடைக்க வேண்டிய கல்வி மறுக்கப்படுகிறது. பலதரப்பட்ட மக்கள் வாழும் இந்தியாவில் வர்ணாஸ்ரமத்தின் படி பின்பற்றி ஒடுக்கப்பட்ட மக்களின் குரல்வலையை நெறிப்பது எந்த விதத்தில் நியாயம் என்று பண்டிதர் அயோத்திதாசர் கேள்வி எழுப்பினார். ஒடுக்கப்பட்ட மக்களின் மீட்சிக்கும், விடுதலைக்கும் வெளியில் இருந்து எவரும் உதவிட முடியாது. நமக்கான வலிமையையும், சமகாலத்தில் இருந்தே, நமக்கான வரலாற்றை அணி திரட்டி எழுவது மூலம்தான் சாதித்துக்கொள்ள முடியும் என அறை கூவல் விடுத்தார் அயோத்தி தாசர்.
அப்போதைய காங்கிரஸ் கட்சியை இந்து காங்கிரஸ் என்று துணிந்து சாடி பேசினார். திராவிடக் கருத்தியலின், திராவிட அரசியலின் முன்னோடி பண்டிதமணி க. அயோத்தி தாசர். அவரது நினைவு நாளான இன்று இவரைப்பற்றி சிந்திப்பதும் பேசுவதும் மிகச்சிறந்ததாக அமையும். அயோத்தி தாசரின் பிறப்பு இறப்புகளை தெரிந்துகொண்டு நாம் என்ன செய்யப்போகிறோம் என்பதைவிட நமது தமிழ்ச் சமூகத்திற்கு அவர் விதைத்து சென்ற சமூக நீதிப்போராட்டங்களை பற்றி தெரிந்துகொள்வோம். தமிழக வரலாற்றையே மாற்றிப்போடும் தத்துவங்களுக்கு முதல் வாசலை திறந்துவிட்டவர் அயோத்தி தாசர். அண்டம், பிண்டம் என இரண்டொன்றும் ஏதுமில்லை. ஆதி சங்கரர் நிறுவிய அத்வைத தத்துவ நூல்களை படித்ததால் 1870ஆம் ஆண்டு தனது 25வது வயதில் அத்வைத அமைப்பை நிறுவி அதன் மூலம் பழங்குடி மக்களை திரட்ட எண்ணினார். பழங்குடிகளான தமிழர்கள் தாழ்த்தப்படுவதை, புறக்கணிக்கப்படுவதைக் கண்டு பொறுக்க முடியாமல் துடித்தார் அயோத்தி தாசர். அத்வைத அமைப்பில் சனாதன போக்கு இருப்பதால் பின்னாளில் அதனை கைவிட்டார்.
19ஆம் நூற்றாண்டின் இறுதியில் வெவ்வேறு பிரிவுகளாக பிரிந்து கிடக்கும் மக்களை ஒன்று சேர்க்க வேண்டும், மக்கள் தமிழராக இருந்தால்தான் சாதியை ஒழிக்க முடியும் என்பதை உணர்ந்த அயோத்தி தாசர் 1891 ஆம் ஆண்டு 'சாதியற்ற திராவிட மகாஜன சபையை' உருவாக்கினார். இலக்கியம், சமூக, சமய வரலாற்று ஆய்வுகளின் அடிப்படையில் புதிய சமூகம் படைக்கும் பணியில் தம்மை முழுவதுமாக அர்ப்பணித்துச் செயல்பட்ட, இவர் தலித் மக்களின் விடுதலைக்காக பெரிதும் போராடினார். தனது வாழ்நாள் முழுவதும் சனாதனத்தை எதிர்த்து போராடிய அயோத்தி தாசரை தந்தை பெரியார் தனது முன்னோடி என அறிவித்துக்கொண்ட வரலாற்று பிண்ணனியும் உண்டு.
அயோத்தி தாசர் வாழ்ந்த காலகட்டத்தில், தான் பார்த்த அனுபவித்த சாதிக்கொடுமைகளை பகுத்தறிவோடு ஒரு கோட்பாடு தான் ஒரு சமூகத்தை அடிமைப்படுத்துகிறது. நம்மை சுரண்டுகிறது நம் மீது ஆதிக்கம் செலுத்துகிறது என்ற புரிதல் கொண்டு போராடியுள்ளார்.
