ஈரோடு மாவட்டம் உப்பிலிபாளையம் சாலை மணிமலை பகுதியைச் சேர்ந்த குருசாமி மகன் சந்துரு(38). இவர் வீட்டிற்கு அருகிலேயே விசைத்தறி பட்டறை வைத்து நடத்தி வருகிறார். இந்நிலையில் திருப்பூர் மாவட்டம் காங்கேயம் பகுதியைச் சேர்ந்த அரசுப் பள்ளியில் 11ஆம் வகுப்பு படிக்கும் மாணவி, பள்ளி விடுமுறையில் சென்னிமலைப் பகுதியில் உள்ள தாத்தா வீட்டிற்கு வந்து தங்கி உள்ளார்.
அப்போது சந்துரு சிறுமியிடம் பழகி உள்ளார். இந்த பழக்கத்தின் மூலம் 2017ஆம் ஆண்டு ஜூலை மாதம் 1ஆம் தேதி சிறுமியை ஆசை வார்த்தை கூறி, விசைத்தறி பட்டறைக்குள் அழைத்துச் சென்று பாலியல் வன்புணர்வு செய்துள்ளார். இதுகுறித்து பாதிக்கப்பட்ட சிறுமி ஈரோடு அனைத்து மகளிர் காவல்நிலையத்தில் அளித்த புகாரின் பேரில் சந்துரு மீது போக்சோ, வன்கொடுமைத் தடுப்பு சட்டம் உட்பட 3 பிரிவுகளின் கீழ் வழக்குப் பதிவு செய்து கைது செய்தனர்.
இந்த வழக்கின் விசாரணை ஈரோடு மகிளா நீதிமன்றத்தில் நடந்து வந்தது. இந்நிலையில், வழக்கின் இறுதி விசாரணை முடிந்த நிலையில் நீதிபதி மாலதி தீர்ப்பளித்தார். அதில் குற்றஞ்சாட்டப்பட்ட சந்துருவுக்கு, சிறுமியை பாலியல் வன்கொடுமை செய்த குற்றத்திற்காக எட்டு ஆண்டுகள் சிறைத் தண்டனையும், ஆயிரம் ரூபாய் அபராதம் விதித்துத் தீர்ப்பளித்தார்.
