தருமபுரி: அக்டோபர் 3ஆம் தேதி, தருமபுரி-கிருஷ்ணகிரி தேசிய நெடுஞ்சாலையில், குண்டல்பட்டி அருகே, அவ்வழியாக செல்வோரை மிரட்டி சிலர் வழிபறி கொள்ளையில் ஈடுபட்டனர்.
இதனைத் தொடர்ந்து, மதிகோண்பாளையம் காவல் ஆய்வாளர், அம்மாதுரை தலைமையிலான காவலர்கள் தீவிர ரோந்து பணியில் ஈடுபட்டனர். அப்போது வழிப்பறியில் ஈடுபட்டவர்களை பிடித்து விசாரணை நடத்தினர்.
அந்த விசாரணையில், வழிப்பறியில் ஈடுபட்டவர்கள், சிவகங்கை மாவட்டம், சுண்ணாம்பு காலவாசல் பகுதியை சேர்ந்த பாண்டித்துரை (33). முத்துபட்டி நைனான்குளம் பகுதியைச் சேர்ந்த சூர்யா( எ) உதயசூரியன் ( 21), திருச்சி மாவட்டம் முசிறி, சேர்குடி அம்மன் நகரை சேர்ந்த மதி( எ) மதியழகன் (28) என்பது தெரிய வந்தது. இம்மூவரும் நண்பர்கள் எனவும் இவர்கள் பல இடங்களில் கொலை கொள்ளைகளில் ஈடுபட்டுள்ளனர் எனவும் தெரியவந்தது. அதே போல், அக்., 3ஆம் தேதி குண்டல்பட்டி பகுதியில் வழிப்பறியில் ஈடுபட்டு வந்ததும் தெரிய வந்தது.
இதனையடுத்து பாதிக்கப்பட்டவர்கள் அளித்த புகாரின் பேரில், ஆய்வாளர் அம்மாதுரை வழக்குப் பதிவு செய்து, மூன்று பேரையும் கைது செய்து சிறையில் அடைத்தனர் .
இவர்கள் மூன்று பேர் மீதும் மதுரை, திருச்சி உள்ளிட்ட பல்வேறு காவல் நிலையங்களில் வழிப்பறியில் ஈடுபட்டது தொடர்பான வழக்கு நிலுவையில் உள்ளது. இதனால் இவர்களை குண்டர் சட்டத்தில் அடைக்க மாவட்ட காவல் கண்காணிப்பாளர் பிரவேஷ்குமார், மாவட்ட ஆட்சியர் எஸ்.பி.கார்த்திகாவிற்கு பரிந்துரை செய்தார். பரிந்துரையின் அடிப்படையில் ஆட்சியர், பாண்டித்துரை, சூர்யா (எ) உதயசூரியன், மதி (எ) மதியழகன் ஆகிய மூன்று பேரையும் குண்டர் சட்டத்தின் கீழ் கைது செய்து சிறையில் அடைக்க உத்தரவிட்டார்.
இதனையடுத்து மூவரும் குண்டர் சட்டத்தின் கீழ் கைது செய்யப்பட்டு சிறையில் அடைக்கப்பட்டனர்.
இதையும் படிங்க: பட்டப்பகலில் ரவுடிகள் வெறிச்செயல்: வணிக வளாகம் சூறை!
