கோயம்புத்தூர் சாலை அருகே சிடிசி மேடு தில்லை நகர் அம்மா உணவகத்துக்கு எதிரே கேட்பாரற்று கேரள மாநில பதிவு எண் கொண்ட வாகனம் இருப்பதாக காவல் துறையினருக்குத் தகவல் வந்துள்ளது.
இதைத்தொடர்ந்து அந்த இடத்துக்கு வந்த காவல் துறையினர் அங்கு நின்றுகொண்டிருந்த KL 51 M 1367 என்ற பதிவு எண் கொண்ட மஹேந்திரா பொலிரோ வாகனத்தை ஆய்வுசெய்தனர்.
அப்போது அதில், தமிழ்நாடு அரசால் தடைசெய்யப்பட்ட புகையிலைப் பொருள்கள் நான்கு மூட்டைகளில் இருந்தது கண்டறியப்பட்டது. இதையடுத்து கோவை மாவட்ட உணவுப் பாதுகாப்புத் துறையினருக்கு காவல் துறையினர் தகவல் தெரிவித்த நிலையில், உணவுப் பாதுகாப்புத் துறை நியமன அலுவலர் கு. தமிழ்ச்செல்வன், பொள்ளாச்சி உணவுப் பாதுகாப்பு அலுவலர்கள் சுப்புராஜ் வேலுச்சாமி ஆகியோர் அங்கு வந்தனர்.
மேலும், பொள்ளாச்சி காவல் உதவி கண்காணிப்பாளர் உத்தரவின்பேரில் பொள்ளாச்சி மகாலிங்கபுரம் காவல் உதவி ஆய்வாளர் பரமேஸ்வரன், காவலர் பெரியசாமி, இளங்கோ ஆகியோரும் சம்பவ இடத்துக்கு வந்து புகையிலை இருந்த வாகனத்தை ஆய்வுசெய்தனர்.
அந்த வாகனத்தில், சுமார் 120 கிலோ எடையுள்ல ரூ.2 லட்சம் மதிப்பிலான புகையிலைப் பொருள்கள் இருப்பதை உறுதிசெய்த உணவுப் பாதுகாப்புத் துறை அலுவலர்கள் அவற்றைக் கைப்பற்றினர்.
இது தொடர்பாக வழக்குப்பதிவு செய்த காவல் துறையினர், வாகனத்தின் ஓட்டுநரைத் தேடிவருகின்றனர்.
இதையும் படிங்க: கேரளாவிற்கு கஞ்சா கடத்த முயன்ற இருவர் கைது!
