துருக்கி: துருக்கியில் சிரியா எல்லையையொட்டிய காஜியன்டப் நகரில் கடந்த 6ஆம் தேதி அடுத்தடுத்து பயங்கர நிலநடுக்கங்கள் ஏற்பட்டன. துருக்கியில் முதலில் 7.8 ரிக்டர் அளவில் நிலநடுக்கம் ஏற்பட்டது. அதைத்தொடர்ந்து துருக்கி, சிரியா இருநாடுகளிலும் அடுத்ததடுத்து நிலநடுக்கங்கள் ஏற்பட்டன.
இருநாடுகளிலும் 300-க்கும் மேற்பட்ட நில அதிர்வுகள் ஏற்பட்டதாகத் தெரிகிறது. இதில் மருத்துவமனைகள், குடியிருப்புகள் உள்பட ஆயிரக்கணக்கான கட்டடங்கள் இடிந்து விழுந்தன. மக்கள் இடிபாடுகளில் சிக்கிக் கொண்டனர்.
இருநாடுகளிலும் மீட்புப் பணிகள் நடைபெற்று வருகின்றன. உறைய வைக்கும் பனியில், 60,000-க்கும் மேற்பட்ட பேரிடர் மீட்புப்படையினர் இடிபாடுகளை அகற்றி, அதிலிருந்து உடல்களை மீட்டு வருகின்றனர். கொத்துக் கொத்தாக உடல்கள் மீட்கப்படும் காட்சிகள் காண்போரை உறைய வைக்கின்றன. உடல்கள் தொடர்ந்து மீட்கப்பட்டு வருவதால், இந்த பேரழிவில் பலியானோர் எண்ணிக்கையும் தொடர்ந்து உயர்ந்து வருகிறது.
இந்த நிலநடுக்கங்களால் துருக்கி, சிரியா இரு நாடுகளிலும் உயிரிழந்தோர் எண்ணிக்கை 11,000-ஐ கடந்தது. தற்போதைய நிலவரப்படி, சுமார் 11,200 பேர் உயிரிழந்ததாகத் தெரிவிக்கப்பட்டுள்ளது. துருக்கியில் பலி எண்ணிக்கை 8,574ஆக உயர்ந்துள்ளதாக அந்நாட்டு பேரிடர் மீட்புத்துறை தகவல் தெரிவித்துள்ளது.
சிரியாவில் உயிரிழந்தோர் எண்ணிக்கை 2,662ஆக அதிகரித்துள்ளதாக அந்நாட்டு சுகாதாரத்துறை தகவல் தெரிவித்துள்ளது. இன்னும் சில நாட்களில் பலி எண்ணிக்கை 20,000ஐ தொடக்கூடும் என மீட்புப்பணிகளில் ஈடுபட்டுள்ள தொண்டு நிறுவனங்கள் தகவல் தெரிவிக்கின்றன.
இதையும் படிங்க:துருக்கி நிலநடுக்கங்கள் : மோப்ப நாய்களுடன் மீட்புப்படையை அனுப்பிய இந்தியா!
