உலகம் முழுவதும் கரோனா பரவல் தொடர்ந்து அதிகரித்தே வருகிறது. பிரிட்டன், பிரான்ஸ் போன்ற நாடுகளில் மே மாதத்திற்குப் பின் குறைந்திருந்திருந்த கரோனா பரவல், தற்போது மீண்டும் அதிகரிக்கத் தொடங்கியுள்ளது.
அதேநேரம் கரோனா தடுப்பு மருந்தின் சோதனையும் தற்போது இறுதிக் கட்டத்தில் உள்ளது. அமெரிக்காவின் ஃபைஸர், மாடர்னா நிறுவனங்களின் கரோனா தடுப்பு மருந்து 95% தடுப்பாற்றலும், ஆக்ஸ்போர்ட் பல்கலைக்கழகத்தின் தடுப்பு மருந்து 90% தடுப்பாற்றலும் கொண்டுள்ளதாக சமீபத்தில் அறிவிக்கப்பட்டன.
இந்நிலையில், செய்தியாளர்களிடம் பேசிய உலக சுகாதார அமைப்பின் இயக்குநர் டெட்ரோஸ் அதானோம், "அறிவியல் உலகின் இந்த அற்புத சாதனையின் முக்கியத்துவத்தை வெளிப்படுத்த முடியாது. மனித குல வரலாற்றிலேயே எந்தவொரு தடுப்பு மருந்தும் இவ்வளவு வேகமாக உருவாக்கப்பட்டதில்லை. தடுப்பு மருந்தைக் கண்டுபிடிப்பதில் நமது அறிவியல் சமூகம் தற்போது புதிய தரத்தை எட்டியுள்ளது.
தடுப்பு மருந்து முடிவுகளைப் பார்த்த பின் கரரோனா பெருந்தொற்றை கட்டுப்படுத்திவிடலாம் என்ற நம்பிக்கை ஏற்பட்டுள்ளது. ஆனால், இந்த தடுப்பு மருந்தை உருவாக்க நாம் எந்த அளவு வேகம் காட்டினோமோ, அதே அளவு வேகத்தில் இந்த தடுப்பு மருந்தை உலகிலுள்ள அனைத்து நாடுகளுக்கும் நியாமான முறையில் விநியோகிக்க வேண்டும்" என்றார்.
ஏழை நாடுகளும் அதிகம் பாதிக்கக் கூடிய நாடுகளும் கரோனா தடுப்பு மருந்து கிடைக்காமல் பாதிக்கப்படக் கூடாது என்பதற்கு உலக சுகாதார அமைப்பு ஒரு முன்னெடுப்பை எடுத்துள்ளது. கரோனா தடுப்பு மருந்து முதலில் எந்த நாடுகளுக்கு எவ்வளவு தேவை என்பதைக் கண்காணித்து, அதற்கு ஏற்றார் போல தடுப்பு மருந்தை விநியோகிக்க கூட்டமைப்பு ஒன்றை உலக சுகாதார அமைப்பு உருவாக்கியுள்ளது. இதில் இதுவரை 187 நாடுகள் இணைந்துள்ளன.
இந்தக் கூட்டமைப்புக்குத் தேவையான நிதி குறித்து டெட்ரோஸ் அதானோம் கூறுகையில், "தடுப்பு மருந்து ஆராய்ச்சி, சோதனை, கொள்முதல், விநியோகம் ஆகியவற்றுக்கு உடனடியாக 4.3 பில்லியன் டாலர் தேவைப்படுகிறது, அதே நேரம் அடுத்த ஆண்டு கூடுதலாக 23.8 பில்லியன் டாலர் தேவைப்படும்" என்றார்.
நாம் முடிந்தவரை பல்வேறு நாடுகளிலும் கரோனா பரவலை முற்றிலுமாக நிறுத்த வேண்டும். அவ்வாறு கரோனா இல்லாத நாடுகளை உருவாக்கும்பட்சத்தில், 2025ஆம் ஆண்டு சர்வதேச வருமானம் கிட்டத்தட்ட ஒன்பது டிரில்லியன் அமெரிக்க டாலர்கள் வரை அதிகரிக்கும் என்று சர்வதேச நிதியம் மதிப்பிட்டுள்ளது" என்றார்.
இதையும் படிங்க: 90 விழுக்காடு வரை பலன்: இந்தியாவில் தயாராகும் ஆகஸ்போர்டு கரோனா தடுப்பு மருந்து!
