சீனாவிலிருந்து பரவத் தொடங்கிய கோவிட்-19 பெருந்தொற்று, தற்போது உலகெங்கிலும் பரவி, சர்வ நாசத்தை ஏற்படுத்தி வருகிறது.
குறிப்பாக, மற்ற நாடுகளைக் காட்டிலும் அமெரிக்கா, ரஷ்யா, பிரேசிலில் பாதிப்பு எண்ணிக்கை அபரிவிதமாக உயர்ந்து வருகிறது.
இந்நிலையில், கோவிட்-19 நோய்த் தொற்றால் பாதிக்கப்பட்டு, லேசான அறிகுறிகளுடன் உள்ள நோயாளிகளுக்கு குளோரோகுயின் மாத்திரையைப் பயன்படுத்துமாறு பிரேசில் அதிபர் போல்சோனாரோ அறிவுறுத்தியுள்ளார்.
இதுகுறித்து பேசிய பிரேசில் அதிபர், "அந்த மருந்தைப் பயன்படுத்திய பலர் உடல்நலத்தில் நல்ல மாற்றங்களைக் கொண்டு வருவதாக நம்பிக்கைத் தெரிவித்துள்ளனர்" என்றார்.
அமெரிக்க அதிபர் டொனால்டு ட்ரம்ப் தான் ஹைடிராக்சி குளோரோகுயின் மருந்தை உட்கொண்டு வருவதாக வெளிப்படையாகத் தெரிவித்திருந்ததை அடுத்து, போல்சோனாரோ இவ்வாறு கூறியுள்ளார்.
பிரேசில் அதிபர் போல்சோனாரோ சொன்னதைப் போன்று, லேசான அறிகுறிகளுடன் உள்ள கோவிட்-19 நோயாளிகளுக்கு ஹைடிராக்சிகுளோரோகுயின் அல்லது குளோரோகுயின் மருந்துகளைப் பயன்படுத்துமாறு அந்நாட்டு சுகாதாரத் துறை வழிகாட்டல் அறிக்கையை வெளியிட்டுள்ளது.
மலேரியா சிகிச்சைக்குப் பயன்படுத்தப்படும் ஹைடிராக்சி குளோரோகுயின், கோவிட்-19 நோயாளிகளுக்குக் கொடுத்தால், தீவிர பக்க விளைவுகளை ஏற்படுத்தலாம் என முன்னணி மருத்துவ சங்கங்கள் எச்சரித்திருந்த நிலையில், பிரேசில் சுகாதாரத் துறை இவ்வாறு அறிக்கை வெளியிட்டுள்ளது.
பிரேசில் அதிபரின் அறிவுறுத்தலுக்கு எதிராக எதிர்ப்பலைகள் கிளம்பிய நிலையில், "அந்த மருந்தைப் பயன்படுத்தலாம் என்பதற்கு எந்த அறிவியல் ஆதாரமும் இல்லை என்பது உண்மைதான். ஆனால், உலக நாடுகள் பல இந்த மருந்தைப் பயன்படுத்தி வருகின்றன.
கோவிட்-19 பெருந்தொற்றுடன் பிரேசில் போராடி வருகிறது. நாம் போர்க்களத்தில் உள்ளோம்.
இந்தப் போரில் நாம் தோல்வியடையலாம். ஆனால், போரில் பிரேசில் எதிர்த்துப் போராடவில்லை என்ற அவப்பெயர் நமக்கு வேண்டாம்" எனப் பதிலளித்துள்ளார், பிரேசில் அதிபர்.
உலகளவில் கரோனாவால் மூன்றாவது அதிகம் பாதிக்கப்பட்ட நாடான பிரேசிலில், இதுவரை இரண்டு லட்சத்து 93 ஆயிரம் பேருக்கு கோவிட்-19 உறுதிசெய்யப்பட்டுள்ளது. 18 ஆயிரத்து 894 பேர் உயிரிழந்துள்ளனர்.
இதையும் படிங்க : காங்கிரஸ் தலைவர் சோனியா காந்தி மீது எஃப்.ஐ.ஆர் பதிவு
