ஹைதராபாத்: தமிழில் ராஜா ராணி, தெறி, மெர்சல், பிகில், ஆகிய படங்களை இயக்கிய அட்லி ஹிந்தியில் ஷாருக்கானை வைத்து இயக்கியுள்ள திரைப்படம் ஜவான். அனிருத் இசையமைத்துள்ள இந்த படம் கடந்த செப்., 7ஆம் தேதி உலகம் முழுவதும் வெளியானது. இந்த படத்தில் ஷாருக்கானுடன் நயன்தாரா, ப்ரியாமணி, யோகிபாபு, தீபிகா படுகோன் உள்ளிட்ட பலர் நடித்திருந்தனர். இந்த படம் பாக்ஸ் ஆபிஸில் 200 கோடிக்கு மேல் வசூல் செய்து சாதனை படைத்து வருகிறது.
ஜவான் படத்தில் நயன்தாராவுக்கு ரசிகர்கள் மத்தியில் கிடைத்த வரவேற்பை தொடர்ந்து பிரபல ஐஎம்டிபி இணையதளத்தில் இந்திய பிரபலங்கள் வரிசையில் முதலிடத்தை பிடித்துள்ளார். ஐஎம்டிபி (Imdb) இந்த வாரம் வெளியிட்ட வரிசையின் படி நடிகர் ஷாருக்கானை பின்னுக்கு தள்ளி முதலிடம் பிடித்துள்ளார். கடந்த வாரம் ஐஎம்டிபி இணையதளம் வெளியிட்ட பிரபலங்கள் வரிசையில் மூன்றாவது இடத்தில் இருந்த நயன்தாரா இந்த வாரம் முதலிடம் பிடித்துள்ளார்.
ஜவான் பட வெற்றிக்கு பிறகு ஐஎம்டிபி (Imdb) இந்திய பிரபலங்கள் வரிசையில் மூன்று பேர் முதல் மூன்று இடங்களை பிடித்துள்ளனர். இந்த வரிசையில் தற்போது நயன்தாரா முதலிடத்தில் உள்ள நிலையில், இரண்டாவது இடத்தில் ஷாருக்கானும், மூன்றாவது இடத்தில் ஜவான் படத்தை இயக்கிய அட்லி இடம் பிடித்துள்ளார்.
நடிகை நயன்தாராவின் கணவரும், இயக்குநருமான விக்னேஷ் சிவன் ஐஎம்டிபி வரிசையில் முதலிடம் பிடித்ததற்கு அவருக்கு வாழ்த்து தெரிவித்துள்ளார். நயன்தாராவிற்கு பெரும் ஊக்கமாக இருக்கும் அவரது கணவர் விக்னேஷ் சிவன், தனது சமூக வலைதள பக்கத்தில் நயன்தாராவை டேக் செய்து ‘தங்கமே உன்னை நினைத்து பெருமைப்படுகிறேன்’ என பதிவிட்டுள்ளார்.
ஐஎம்டிபி இணையதளம் சினிமாவுக்காக உருவாக்கப்பட்ட மிகவும் பிரபலமான நம்பகத்தன்மை மிகுந்த இணையதளமாகும். இதில் ஒவ்வொரு வாரமும் ரசிகர்கள் பிரபலங்கள் வரிசையை முடிவு செய்வர். ஐஎம்டிபி இணையதளத்தை ஒவ்வொரு மாதமும் 200 மில்லியன் ரசிகர்கள் பயன்படுத்தி வருகின்றனர்.
இதையும் படிங்க: மலேசியா பயணம் முடித்து சென்னை திரும்பிய ரஜினி... ரசிகர்கள் உற்சாகம்!
