பழம்பெரும் பஞ்சாபி பாடகர் சுரிந்தர் ஷிந்தா காலமானார்: பிரபலங்கள் இரங்கல்!

பழம்பெரும் பஞ்சாபி பாடகர் சுரிந்தர் ஷிந்தா உடல்நலக்குறைவால் இன்று காலமானார். அரசியல் தலைவர்கள், பிரபலங்கள் எனப் பலரும் இரங்கல் தெரிவித்து வருகின்றனர்.

லூதியானா: பிரபல பஞ்சாபி பாடகர் சுரிந்தர் ஷிந்தா (64) உடல்நலக்குறைவால் இன்று (26.07.2023) காலமானார். "புட் ஜட்டன் தே", "ஜட் தியோனா மோர்" மற்றும் "ட்ரக் பல்லியா" ஆகிய வெற்றி பாடல்களைப் பாடிய இவர் உடல் நலம் பாதிக்கப்பட்டு தயானந்த மருத்துவக் கல்லூரி மற்றும் மருத்துவமனையில் சிகிச்சைப் பெற்று வந்த நிலையில் சிகிச்சை பலனின்றி இன்று உயிரிழந்துள்ளார்.

பஞ்சாபி மொழி பாடகர்களில் மிகவும் பிரபலமான இவர் ஏராளமான வெற்றி பாடல்களைக் கொடுத்துள்ளார். "புட் ஜட்டன் தே", "உச்சா தர் பாபே நானக் டா" மற்றும் "பட்லா ஜடி டா" போன்ற பல படங்களில் தனது குரலைப் பதிவு செய்த சுரிந்தர் ஷிந்தா தனக்கென ஒரு ரசிகர் பட்டாளத்தைத் திரட்டி வைத்திருந்தார். அவரின் இழப்பு பஞ்சாபி மொழி திரைத்துறைக்கும், அம்மாநில மக்களுக்கும் பெரும் அதிர்ச்சியையும், சோகத்தையும் ஏற்படுத்தியுள்ளது. மேலும், ஏராளமான திரைப் பிரபலங்கள், அரசியல் தலைவர்கள் எனப் பலரும் அவரின் உயிரிழப்புக்கு இரங்கல் தெரிவித்து வருகின்றனர்.

இது குறித்து தனது டிவிட்டரில் பதிவு ஒன்றை வெளியிட்டுள்ள பஞ்சாப் மாநில முதலமைச்சர் பகவந்த் மான், “பிரபல பாடகர் சுரிந்தர் ஷிந்தாவின் மரணச் செய்தி கேட்டு மிகுந்த வேதனையுற்றதாகவும், பஞ்சாபின் குரல் முற்றிலும் மவுனமாகிவிட்டது" எனவும் கூறியுள்ளார்.

இதையும் படிங்க: 'ஒத்த ஓட்டு முத்தையா' படத்தின் மூலம் மீண்டும் கதாநாயகனாக களமிறங்கும் கவுண்டமணி!

மேலும் அம்மாநிலத்தைச் சேர்ந்த ஷிரோமணி அகாலி தள கட்சியின் தலைவர் சுக்பீர் சிங் தனது ட்விட்டர் பக்கத்தில், " பஞ்சாபி இசையில் சுரிந்தர் ஷிந்தாவின் பங்களிப்பு விலை மதிப்பற்றது எனவும்; அவரது ரசிகர்கள் மற்றும் குடும்பத்தினருக்கு ஆழ்ந்த இரங்கல்" எனவும் பதிவிட்டுள்ளார்.

அவரைத் தொடர்ந்து சுரிந்தர் ஷிந்தாவின் இழப்புக்கு இரங்கல் தெரிவித்து டிவிட்டரில் பதிவிட்டுள்ள பாடகரும் நடிகருமான ஹர்பஜன் மான், "பஞ்சாபி நாட்டுப்புறப் பாடலின் பொற்காலம் முடிவுக்கு வந்துவிட்டது" எனக் கூறியுள்ளார்.

பஞ்சாபி நாட்டுப்புறப் பாடல்களில் மிகவும் பிரபலமான சுரிந்தர் ஷிந்தா இசைக்காகவே தனது ஒட்டுமொத்த வாழ்நாளையும் அர்ப்பணித்தவர். அவரின் குரலுக்குப் பஞ்சாபி மக்கள் அடிமை என்றே கூறலாம். அந்த அளவுக்குத் தனது குரலால் ரசிகர்களின் மனதைக் கட்டிப்போட்ட சுரிந்தர் ஷிந்தா நீண்ட நாள் உடல்நலம் பாதிக்கப்பட்டு சிகிச்சைப் பெற்று வந்த நிலையில் இன்று உயிரிழந்துள்ளார்.

அவரின் இறுதிச் சடங்குகளுக்கான ஏற்பாடுகள் நடைபெற்று வரும் நிலையில், பலரும் அவரது உயிரிழப்புக்கு இரங்கல் தெரிவித்து வருகின்றனர். அவரது மகன் மனிந்தர் ஷிந்தாவும் இசைக்கலைஞர் என்பது குறிப்பிடத்தக்கது.

இதையும் படிங்க: MS Dhoni:தோனி நிச்சயம் சினிமாவில் நடிப்பார் - எல்ஜிஎம் பட விழாவில் சாக்ஷி பேச்சு!