சென்னை: தமிழ் சினிமாவில் மறக்க முடியாத பெயர் கே.ஆர். விஜயா. எம்ஜிஆர், சிவாஜி தொடங்கி பிளாக் & ஒயிட் சினிமா காலத்தில் இருந்து பல முன்னணி நடிகர்களுடன் ஜோடி சேர்ந்து நடித்தவர். புன்னகை அரசியாக ரசிகர்கள் மனதில் நீங்கா இடம் பிடித்தவர். நீண்ட இடைவெளிக்குப் பிறகு மீண்டும் ஒரு தமிழ் படத்தில் நடித்து முடித்துள்ளார் கே.ஆர்.விஜயா.
The Sparkland நிறுவனத்தின் சார்பில் இயக்குநர் ரவி பார்கவன் இயக்கத்தில், பிரகாஷ் சந்திரா தயாரித்து நடிக்க, உண்மை சம்பவத்தின் அடிப்படையில் உருவாகி வரும் உணர்ச்சிகரமான திரைப்படம் “மூத்தகுடி”. இந்த படத்தில் நீண்ட இடைவேளைக்குப் பிறகு மூத்த நடிகை கே ஆர் விஜயா திரையில் மீண்டும் நடித்துள்ளார். 1970களில் நடந்த உண்மை சம்பவத்தை அடிப்படையாக வைத்து உருவாக்கப்பட்டிருக்கும் இப்படத்தின் கதை 1970, 1990 மற்றும் நடப்பு காலகட்டத்தில் நடப்பதாக அமைக்கப்பட்டுள்ளது.
மூன்று காலகட்டங்களில் நடக்கும் கதை என்பதால் பல விதமான ஆராய்ச்சிக்கு பிறகு, அந்தந்த காலகட்டத்தை தத்ரூபமாக திரையில் கொண்டு வந்துள்ளது. 'மாயாண்டி குடும்பத்தார்' படத்தின் கதாநாயகன் தருண் கோபி இப்படத்தில் முக்கிய கதாபாத்திரத்தில் நடித்துள்ளார். அறிமுக நாயகி அன்விஷா கதாநாயகியாக அறிமுகமாகிறார். இவர்களுடன் ஆர்.சுந்தர்ராஜன், ராஜ் கபூர், சிங்கம்புலி, யார் கண்னண் உள்ளிட்டோர் முக்கிய கதாபாத்திரங்களில் நடித்துள்ளனர்.
படம் குறித்து இயக்குனர் ரவி பார்கவன் கூறியதாவது, ”நிஜத்தில் நடந்த உண்மை சம்பவத்தை அடிப்படையாக வைத்து உருவாக்கப்பட்டது தான் இப்படம். உண்மை சம்பவத்தை மிக அழகான திரைக்கதையாக மாற்றியுள்ளேன். இந்த கதைக்கு ஏற்ப அந்தந்த காலகட்டத்தில் பயன்படுத்திய பொருட்கள் பயன்படுத்தப்பட்டுள்ளது.
திரையில் நீங்கள் பார்க்கும் போது அந்த காலகட்டத்தில் வாழும் அனுபவத்தை தரும். மூத்த நடிகை கே ஆர் விஜயா இதில் முக்கிய கதாப்பாத்திரத்தில் நடித்துள்ளார். படப்பிடிப்பின் போது கேரவனே வேண்டாம், படக்குழுவினருடன் இருக்கிறேன் என்று எப்போதும் படப்பிடிப்பில் தான் இருப்பார். எல்லோருடனும் வெகு இயல்பாக நட்புறவோடு பழகினார்.
அவரை மீண்டும் திரையில் பார்ப்பது ரசிகர்களுக்கு விருந்தாக இருக்கும். நடிகர் தருண் கோபி எதிர் நாயகனாக நடித்துள்ளார். இப்படம் சமூகத்தின் மீதான அக்கறையை வெளிப்படுத்தும் ஒரு நல்லபடைப்பாக, ரசிகனுக்கு ஒரு நல்ல அனுபவமாக இருக்கும்” என்றார். “அசுரன்” திரைப்பட படப்பிடிப்பு நடந்த, கோவில்பட்டி, திருநெல்வேலி, சாத்தூர், கயத்தாறு, எட்டையபுரம் உள்ளிட்ட இடங்களில் இப்படத்தின் படப்பிடிப்பு இரண்டு கட்டமாக நடந்து முடிந்துள்ளது. தற்போது போஸ்ட் புரடக்சன் பணிகள் மிகத்தீவிரமாக நடைபெற்று வருகிறது. விரைவில் படத்தின் இசை, டிரெய்லர் மற்றும் திரையரங்கு வெளியீடு குறித்த அறிவிப்புகள் அதிகாரப்பூர்வமாக வெளியாக உள்ளது.
இதையும் படிங்க: SK தயாரிப்பில் மீண்டும் ஹீரோவாக களமிறங்கும் சூரி...
