சென்னை: சிம்பு நடிப்பில் கௌதம் மேனன் இயக்கத்தில் உருவாகி உள்ள வெந்து தணிந்தது காடு படத்தின் ஆடியோ மற்றும் ட்ரெய்லர் வெளியீட்டு விழா நேற்று சென்னையில் நடந்தது. இந்த விழாவில் நடிகர்கள் கமல் ஹாசன், நாசர், ஜீவா, விக்ரம் பிரபு, சசி, ஆர்ஜே பாலாஜி, யோகி பாபு, இயக்குநர்கள் லிங்குசாமி, ஏ.எல்.விஜய், தயாரிப்பாளர் அன்புச் செழியன், பிக்பாஸ் ராஜூ, வருண் உள்ளிட்டோர் கலந்து கொண்டனர்.
அப்போது பேசிய இயக்குநர் கௌதம் மேனன், ‘முதலில் நதிகளிலே நீராடும் சூரியன் என்றுதான் பெயர் வைத்து தொடங்கினோம். மூன்று மாதம் பணிபுரிந்தோம். ரஹ்மான் மூன்று பாடல்களை கொடுத்திருந்தார். ஜெயமோகனை பார்த்தபிறகு புதிய ஹீரோவை வைத்து எடுக்கலாம் என்று இருந்தோம். தயாரிப்பாளர் கதையை கேட்டு இப்படத்தை தயாரிக்க ஒப்புக்கொண்டார். ரஹ்மான் இப்படத்திற்கு புதிய பாடல்களை கொடுத்தார். இவர்கள் கொடுத்த சப்போர்ட்தான் இங்கு நிற்க காரணம்.
சிம்புவுடன் பணிபுரிவது எப்போதுமே எதிர்பார்ப்பாக இருக்கும். விண்ணைத்தாண்டி வருவாயா போன்று ஒரு குறும்படத்தை லாக்டவுனில் பண்ணினோம். சிம்பு நடித்துக்கொடுத்தார். இது உண்மையான மனிதரின் கதை. வாழ்க்கையை மூன்று மணியில் சொல்லியுள்ளது. இது இதனுடன் முடிவதல்ல தொடரும். எல்லோருடைய வாழ்விலும் பெண்கள் இல்லாமல் பகுதி இருக்காது. ஒரிஜினல் கதையில் காதல் இல்லை. அவருடைய அனுமதியுடன் காதலை இப்படத்தில் இணைத்தேன்.
ரஹ்மானுடன் சினிமா பற்றித்தான் பேசுவேன். இப்படம் பாடல்கள் நிறைந்த படம். தாமரை அழகான வரிகளை எழுதியுள்ளார். நல்ல அனுபவமாக இருந்தது. என்னுடைய கதாபாத்திரங்களில் கார்த்தியும் நான் தான். ஜெஸ்ஸியும் நான்தான். மறக்குமா நெஞ்சம் பாடல் நள்ளிரவு 2.30 மணிக்குத்தான் உருவானது என்த் தெரிவித்தார்.
அதன்பின் பேசிய ஏ.ஆர்.ரஹ்மான், "கௌதம் மேனன் ஒரு இசைக் காதலன். எது கொடுத்தாலும் எடுத்துக்கொள்வார். என்மேல் உள்ள நம்பிக்கை அது. தாமரை எழுதினால் அப்பாடலில் மேஜிக் நிகழ்ந்துவிடும். ஒரு பாடல் மாதிரி இன்னொன்று என்று கேட்டாலே அது பழசு ஆகிவிடும். புதுசுதான் வேண்டும். கௌதம் மற்றும் சிம்புவுக்காக இப்படத்தை ஒப்புக்கொண்டேன். இளையராஜா மற்றும் நான் இருவரும் ஒரே விமானத்தில் வந்தோம். இளையராஜா போட்டோ எடு என்றார். அதனால் தான் எடுத்தேன் எனத் தெரிவித்தார்.
இதனைத் தொடர்ந்து பேசிய நடிகை ராதிகா, ‘கௌதம் மேனன் மற்றும் அவரது குழுவிற்கு வாழ்த்துகள். இங்கு இரண்டு நாயகர்கள் உள்ளனர். ரகுமான் மற்றும் சிம்பு இருவரும்தான். சிம்புவை எனக்கு சின்ன வயதில் இருந்தே தெரியும். இப்படத்தில் அதிரடியான சிம்புவை பார்க்க போகிறீர்கள். படத்தில் டைனமிக்காக உள்ளார். ட்ரெய்லரை பார்த்து நன்றாக இருக்கிறது என்றேன். இப்படம் ரசிகர்களை ஆச்சரியப்படுத்தும் எனக் கூறினார்.
நடிகர் சிம்பு பேசுகையில்: ‘நான் இங்கு நிற்க காரணமான எனது ரசிகர்களுக்கு வணக்கம். இதுபோன்ற நிகழ்ச்சிகள் சமீபகாலங்களில் எனக்கு நடந்ததில்லை. வேறு ஒரு நிகழ்ச்சி என்று நினைத்தேன். நான் ஹெலிகாப்டரில் வரவில்லை. ஹெலிகாப்டர் மட்டும்தான் வந்தது. விக்ரம் படம் பார்ப்பதற்கு முன்பே இப்படம் சூப்பர் ஹிட் ஆகும் என்று நான் சொன்னேன்.
கமல்ஹாசன் சார் இங்கு வந்ததற்கு நன்றி. என்னுடைய பிரதர் யுவன் வந்ததற்கு நன்றி. அப்பா சிகிச்சைக்காக அமெரிக்கா சென்றது ஐசரி அவர்களால்தான் அவருக்கு ரொம்ப நன்றி. கௌதமும் நானும் மூன்றாவது முறையாக இணைந்துள்ளோம். இருவரும் இணைவது எனது மேஜிக். இதிலும் அந்த மேஜிக் நடக்கும். இந்த நிகழ்ச்சியின் நாயகன் ரஹ்மான் சார். யுவனை போல ரஹ்மானும் எனக்கு நல்ல பாடல்களை கொடுத்துள்ளார்.
நான் சின்ன வயதில் ரஹ்மான் வீட்டில் சென்று கீபோர்ட் எல்லாம் உடைத்துள்ளேன். இப்படத்தில் மல்லிப்பூ என்ற பாடல் ரசிகர்களுக்கு பிடிக்கும் என்று நினைக்கிறேன். முதல்முறையாக ஜெயமோகன் இப்படத்திற்கு கதை எழுதியுள்ளார். உடன் நடித்த அனைவருக்கும் நன்றி. முதலில் காதல் கதைதான் கௌதம் சொன்னார். எதாவது வித்தியாசமாக செய்யலாம் என்றேன்.
அப்போதுதான் ஜெயமோகன் கதை வந்தது. இது புதுமுகம் நடிக்க வேண்டியது. இதில் 19 வயது பையனாக வர வேண்டும் என்றார். கடவுள் அருளால் உடல் எடையை குறைத்து நடித்தேன். இது மாஸ் கிளாஸ் என்று எல்லாம்நான் சொல்லவில்லை. நீங்கள் பார்த்து சொல்லணும். இது கமர்ஷியல் படம் இல்லை. அதனை எதிர்பார்த்து வராதீர்கள். முத்து என்ற இளைஞனின் பயணம். கிராமத்தில் இருந்து கஷ்டப்பட்டு வரும் இளைஞர்களுக்கு சமர்ப்பணமாக இப்படத்தை பார்க்கிறேன். மாநாடு பட ஆடியோ நிகழ்ச்சியில் அழுதீங்க படம்ஹிட்டு. இதிலும் அழுதால் படம் வெற்றிபெறும் என்றனர். நான் அழுகை எல்லாம் விட்டுவிட்டு சந்தோஷத்தில் இருக்கிறேன். மாநாடு வெற்றி மக்கள் கொடுத்தது. மக்கள் வித்தியாசமான படத்தை எதிர்பார்த்து உள்ளனர்.
மக்களுக்கு பிடித்த படங்களை எடுக்க வேண்டும். எல்லாரும் எனக்கு ஆட்டிட்டியூட் என்று சொல்வார்கள். எனக்கு இப்போது ஆட்டிட்டியூட் கிடையாது. கிராட்டிடியூட் தான். நல்லது செய்தவர்களுக்கு நன்றியுடன் இருங்கள். எப்படி நன்றி சொல்வது என்று தெரியவில்லை. நான் என் ரசிகர்களுக்காக சந்தோஷப்படுகிறேன். நல்ல படங்கள் நீங்கள் நினைப்பது போன்ற படங்களில் நடிப்பேன். நீங்கள் பெருமைப்படும் படங்களில் நடிப்பேன். நீங்கள் கண்டிப்பாக என்னை பார்த்துக்குவீங்க... அதை நான் மறக்கமாட்டேன்.
உதயநிதி அண்ணா இங்கு வரமுடியவில்லை. இப்படத்தை அவர் வெளியிடுகிறார். தமிழ் சினிமா நல்ல இடத்திற்கு செல்ல முக்கியமானவராக இருக்கிறார். விண்ணைத்தாண்டி வருவாயா படத்திற்கு பிறகு 15 வருடங்களுக்கு பிறகு இப்படத்தில் இணைந்துள்ளோம். அப்பாவுக்கு உடல்நலம் சரியில்லாத போது உதவிய தமிழ்நாடு முதலமைச்சருக்கு நன்றி. பசங்களை கல்யாணம் கல்யாணம் என்று தொந்தரவு செய்யாதீர்கள். சமீபத்தில் தவறான கல்யாணமும் நடக்கிறது எனத் தெரிவித்தார்.
கமல்ஹாசன் பேசுகையில்: சிம்புவிற்கும் இப்படத்தில் நடித்த அவரது தம்பிக்கும் வணக்கம். (தாடியில்லாத சிம்பு). இந்த நெருப்பு அணையாது. வீண்போகாது. அது சிம்புவை குறிப்பதாகவே நினைக்கிறேன். குழந்தையாக பார்த்த சிம்புவே வெள்ளை தாடி வைத்துள்ளார். நான் வைத்தால் என்ன. பல திறமையாளர்கள் வந்துள்ளனர்.
ஜெயமோகன் திரும்ப சினிமாவுக்கு வரவேண்டும் அதற்கு இப்படம் மாபெரும் வெற்றி அடைய வேண்டும். வந்தவுடன் அப்பா எப்படி இருக்கிறார் என்றுதான் கேட்டேன். தமிழ் சினிமாவை தூக்கி நிறுத்துவதும் தமிழ் படம்தான். கெடுப்பதும் தமிழ் படம்தான். நட்சத்திர அந்தஸ்து இருக்கும் இல்லாமலும் போகும்.
திறமையை நாளுக்கு நாள் வளர்த்துக்கொள்ள வேண்டும். பயிற்சியை நிறுத்திவிடக்கூடாது. இதுபோன்ற வித்தியாசமான முயற்சிகளை செய்தால் மக்கள் கைவிட மாட்டார்கள். த நல்ல சினிமாக்களை மக்கள் கைவிட்டது கிடையாது. தமிழ் சினிமாவை தூக்கி நிறுத்தியது எந்தவொரு தனி நடிகனும் கிடையாது. மக்கள்தான். எல்லா திறமைகளும் இங்கு உள்ளன. அதனை அடையாளம் கண்டுகொள்ள வேண்டும். விக்ரம் படத்தில் கடைசி காட்சியில் வாயில் சுவிங்கம் இல்லை. அதுவும் நடிப்புதான் என்று தெரிவித்தார்.
இதையும் படிங்க:'வெந்து தணிந்தது காடு' ட்ரெய்லர் ; பார்ட்-2விற்கு லீடு கொடுத்த கௌதம் மேனன்
