தூறல் நின்னு போச்சு, டார்லிங் டார்லிங் டார்லிங், முந்தானை முடிச்சு இப்படி பாக்யராஜ் இயக்கத்தில் பெரும் வெற்றி பெற்ற படங்களுக்கு நடன இயக்குநராக இருந்தவர், சின்னா. 300 படங்களுக்கும் மேல் நடனக் குழுவில் உதவியாளராக இருந்து நடன அமைப்புகளும் செய்துள்ளார்.
ஆந்திர மாநிலம், ஜங்கா ரெட்டி கூடம், இவரது சொந்த ஊர். இவருடைய தந்தை ஹைதராபாத்திலுள்ள இசைக்கல்லூரியில் முதல்வராக இருந்தவர். பல ஆண்டுகள் கஷ்டப்பட்டு கடைசியாக சேஷூ மாஸ்டரிடம் உதவியாளனாக சேர்ந்தார். இவருக்கு இனிய வாழ்வு இயக்குநர் பாக்யராஜ் அவர்களின் வடிவத்தில் வந்தது.
இவரது திறமையை கவனித்த பாக்யராஜ் ‘’தூறல் நின்னு போச்சு’’ படத்தில் இவரைத் தமிழ்த் திரையுலகிற்கு அறிமுகம் செய்து வைத்தார். அதனை தொடர்ந்து ’டார்லிங் டார்லிங் டார்லிங்’, முந்தானை முடிச்சு படங்களில் இவருக்கு வாய்ப்பளித்தார். பாக்யராஜ் சொந்தமாக தயாரித்த ‘தாவணிக்கனவுகள்’ படத்திற்கும் இவர் தான் நடன இயக்குநர்.
இது போக ‘வாங்க மச்சான் வாங்க’, ‘உன்னை விட மாட்டேன்’, ஆர்.சுந்தர ராஜனின் இயக்கத்தில் ‘என்னைத் தெரிஞ்சா சொல்லாதீங்க’ போன்ற பல படங்களுக்கு நடன இயக்குநராக இருந்துள்ளார். இவரது மறைவுக்கு திரைத் துறையினர் பலரும் இரங்கல் தெரிவித்து வருகின்றனர்.
இதையும் படிங்க: சென்னை விமான நிலையத்தில் அஜித்; வைரலாகும் வீடியோ!
