சென்னை: தயாரிப்பாளர் மனோஜின் பீமாஸ் என்டர்டெய்ன்மென்ட்ஸ் மற்றும் தயாரிப்பாளர் சாமுவேல் காட்சனின் ஜேகேஎம் புரொடக்சன்ஸ் ஆகிய இரு நிறுவனங்களும் இணைந்து தயாரித்துள்ள திரைப்படம், ‘D 3’. அறிமுக இயக்குநர் பாலாஜி இயக்கியுள்ள இப்படத்தில், பிரஜின் கதாநாயகனாக நடித்துள்ளார்.
வித்யா பிரதீப் கதாநாயகியாக நடிக்க, சார்லி முக்கிய வேடத்தில் நடித்துள்ளார். இவர்களுடன் வர்கீஸ் மேத்யூ, ’மோகமுள்’ அபிஷேக் உள்ளிட்டப் பலரும் முக்கியமான கதாபாத்திரத்தில் நடித்துள்ளனர். தற்போது இப்படத்தின் டைட்டில் லுக்கை பிரபல இயக்குநர் வெங்கட் பிரபு வெளியிட்டுள்ளார். இப்படம், படம் ஒரே நாளில் நடக்கும் கதைக்களத்தை மையமாகக் கொண்டு உருவாக்கப்பட்டுள்ளது.
இதுகுறித்து D3 திரைப்படத்தின் இயக்குநர் பாலாஜி கூறுகையில், “நான் கேள்விப்பட ஒரு உண்மை விஷயம் பற்றி, அதேசமயம் இதுவரை வெளிவராத விஷயம் பற்றி இந்த கதையை உருவாக்கியுள்ளேன். அதனால் படம் ஆரம்பம் முதல் இறுதி வரை விறுவிறுப்பாக நகரும். இயற்கை ஏற்படுத்திய பல பிரச்னைகளையும், தடைகளையும் தாண்டி இந்தப் படத்தின் படப்பிடிப்பை நடத்தி முடித்தோம்.
குற்றாலத்தில் மழை சீசன் இல்லாத சமயத்தில் தான் படப்பிடிப்பை நடத்த தொடங்கினோம். ஆனால் படப்பிடிப்பு நடந்த 70% நாட்களில், எதிர்பாராத விதமாக மழையின் குறுக்கீட்டுடன் தான் படப்பிடிப்பை நடத்த வேண்டியிருந்தது. கரோனா சமயத்தில் கிட்டத்தட்ட 60% படப்படிப்பு முடிவடைந்த சமயத்தில், படத்தில் முக்கியமான கதாபாத்திரத்தில் நடித்து வந்த 30 வயது நடிகர் ஒருவர் கரோனா தொற்றால் மரணமடைந்தார்.
அதனால், அவருக்குப் பதிலாக வேறு ஒரு நடிகரை வைத்து மீண்டும் படப்பிடிப்பை நடத்தினோம். அதேபோல சென்னையில் உள்ள ஒரு பிரபல மருத்துவமனைக்கு ஒரு நாள் வாடகையாக மட்டும் இரண்டரை லட்சம் ரூபாய் செலுத்தி படப்பிடிப்பு நடத்த தயார் நிலையில் இருந்தோம்.
ஆனால், அன்றைய தினம் காலை படப்பிடிப்பில் கலந்துகொள்ள ஹைதராபாத்தில் இருந்து சென்னை வந்திறங்கிய நடிகர் வர்கீஸ் மேத்யூவுக்கு விமான நிலையத்திலேயே கோவிட் பாசிடிவ் என ரிசல்ட் வர, படப்பிடிப்பு ரத்தானது. இப்படி நிறைய அனுபவங்களைக் கடந்து இந்தப்படம் உருவாகியுள்ளது” எனத் தெரிவித்துள்ளார்.
மேலும், இப்படத்தின் இசையினை இசையமைப்பாளர் ஸ்ரீஜித் எடவானா மேற்கொண்டுள்ளார். படத்தின் காட்சிகளை மணிகண்டன் ஒளிப்பதிவு செய்ய, ராஜா ஆறுமுகம் கட் செய்து, படத்தொகுப்பு பணிகளை செய்துள்ளார். ராம்போ விமல் படத்தின் சண்டைக் காட்சிகளை இயக்கியுள்ளார்.
இதையும் படிங்க: கணவனை அழைத்துவர இருசக்கர வாகனத்தில் சென்ற மனைவி: லாரி மோதி உயிரிழப்பு
