ஹைதராபாத்: தமிழ், தெலுங்கு, இந்தி உள்ளிட்ட பல்வேறு மொழிகளிலும் நடித்து வரும் பிரபல நடிகை தமன்னாவின் திருமணம் குறித்து கடந்த சில மாதங்களாக பல்வேறு வதந்திகள் பரவி வந்தன. குறிப்பாக நடிகர் விஜய் வர்மாவும் நடிகை தமன்னாவும் காதலிப்பதாக சமூக வலைதளங்களில் பேசப்பட்டது. அதனை உறுதிப்படுத்தும் வகையில், இருவரும் சேர்ந்திருக்கும் புகைப்படங்கள் இணையத்தில் வெளியாகி வந்தன. புத்தாண்டு கொண்டாட்டம் மற்றும் காதலர் தினத்தன்று இருவரும் சேர்ந்து எடுத்துக் கொண்ட புகைப்படங்கள் வைரலாகப் பரவின.
இதற்கிடையில் எல்லா வதந்திகளுக்கும் முற்றுப்புள்ளி வைக்கும் வகையில், நடிகர் விஜய் வர்மாவை காதலிப்பதாக கடந்த சில நாட்களுக்கு முன்பு தமன்னா தெரிவித்தார். ஒன்றாக நடித்ததால் மட்டுமே விஜய் வர்மாவை காதலிக்கவில்லை என்றும், அவர் தனக்காக எல்லாவற்றையும் விட்டுவிட்டு வந்ததாகவும், அவர் தனது உலகத்தைப் புரிந்து கொண்டவர் என்றும் கூறியிருந்தார்.
இந்த நிலையில், அருணிமா ஷர்மா இயக்கத்தில் தமன்னா நடிப்பில் ஓடிடியில் வெளியாகியுள்ள "ஜீ கர்தா" வெப் சீரிஸின் புரமோஷன் நிகழ்ச்சியில் நடிகை தமன்னா கலந்து கொண்டார். அந்த நிகழ்ச்சியில் பேசிய அவர் திருமணம் குறித்து பல்வேறு விஷயங்களை பகிர்ந்தார்.
அவர் பேசுகையில், "ஒருவர் திருமணம் செய்து கொள்ள விரும்பும் நேரத்தில்தான் திருமணம் செய்து கொள்ள வேண்டும் என்று நான் நினைக்கிறேன். திருமணம் ஒரு பெரிய பொறுப்பு. அது ஒரு பார்ட்டி அல்ல. அதில், குழந்தைகள், செல்லப்பிராணிகளைப் பராமரிப்பது உள்ளிட்ட பல வேலைகள் அதில் இருக்கின்றன. அதனால், அந்த பொறுப்புகளை ஏற்க தயாராக இருக்கும்போது, திருமணம் செய்யுங்கள். வயது காரணமாகவோ, மற்றவர்கள் திருமணம் செய்கிறார்கள் என்றோ திருமணம் செய்யக் கூடாது.
நான் பல வருடங்களுக்கு முன்பு சினிமாவில் நடிக்கத் தொடங்கியபோது, ஒரு நடிகரின் சினிமா வாழ்க்கை என்பது எட்டு முதல் பத்து ஆண்டுகள் மட்டுமே என்று தோன்றியது. அதனால், எனக்கு 30 வயது ஆனவுடன் திருமணம் செய்துகொண்டு இரண்டு குழந்தைகளைப் பெற வேண்டும் என்று நினைத்திருந்தேன். ஆனால், நான் 30 வயதை எட்டியபோது அப்படித் தோன்றவில்லை, நான் அப்போதுதான் புதிதாக பிறந்ததுபோல உணர்ந்தேன்" என்று கூறியுள்ளார்.
நடிகை தமன்னாவும், நடிகர் விஜய் வர்மாவும், லஸ்ட் ஸ்டோரிஸ்-2 படத்தில் இணைந்து நடித்துள்ளனர். இப்படம் வரும் 29ஆம் தேதி நெட்ஃபிளிக்சில் வெளியாகிறது.
இதையும் படிங்க: Tamanna: நடிகர் விஜய் வர்மாவுடன் காதல்.. மனம் திறந்த நடிகை தமன்னா..!
